இஸ்ரேலில் பணியாற்றி வரும் உத்தரப் பிரதேசத்தைச் சேர்ந்த தொழிலாளர்கள், நாட்டில் கட்டுமானப் பணிகள் வழக்கம்போல் நடைபெற்று வருவதாக தெரிவித்துள்ளனர்.இஸ்ரேல் பாதுகாப்பு அமைப்புகள் மற்றும் வான் பாதுகாப்பு ஏற்பாடுகள் காரணமாக இயல்பு வாழ்க்கை பெரிதாக பாதிக்கப்படவில்லை என்றும் அவர்கள் கூறுகின்றனர். ஏவுகணை அச்சுறுத்தல் ஏற்படும் நேரங்களில் சைரன் ஒலி எழுப்பப்படுவதுடன், அப்போது மட்டுமே பொதுமக்கள் பாதுகாப்பு அறைகளில் தஞ்சமடைகின்றனர்.
இஸ்ரேல் முழுவதும் சுமார் நாற்பத்தி இரண்டாயிரத்துக்கும் மேற்பட்ட இந்திய தொழிலாளர்கள் பல்வேறு துறைகளில் பணியாற்றி வருகின்றனர். கட்டுமானம், விவசாயம், தகவல் தொழில்நுட்பம் உள்ளிட்ட துறைகளில் அவர்கள் அதிக அளவில் ஈடுபட்டு வருகின்றனர்.
உத்தரப் பிரதேசத்தின் பாராபங்கி பகுதியைச் சேர்ந்த சுமார் இருபத்தைந்து பேர் டெல் அவிவ் நகரில் கட்டுமானப் பணியில் உள்ளனர். அவர்களில் ஒருவர் வீடியோ அழைப்பில் குடும்பத்தினரிடம் பேசுகையில், ஏவுகணை அச்சுறுத்தல் இருந்தாலும் அவை பெரும்பாலும் நடுவானில் தடுத்து அழிக்கப்படுவதாகவும், தங்களது அன்றாட வாழ்க்கை மற்றும் வேலை நடவடிக்கைகள் தொடர்ந்து நடைபெறுவதாகவும் தெரிவித்தார்.
மற்றொரு தொழிலாளரும், சைரன் ஒலி கேட்கும் போது மட்டும் பாதுகாப்பு அறைகளுக்கு செல்வதாகவும், பின்னர் மீண்டும் பணிகளைத் தொடர்வதாகவும் கூறினார்.இஸ்ரேலில் உள்ள தொழிலாளர்களின் உறவினர்கள் கூறுகையில், சைரன் ஒலி கேட்கும் நேரங்களில் மட்டுமே அவர்கள் பாதுகாப்பு நடவடிக்கைகளை மேற்கொள்வதாகவும், வீடியோ அழைப்புகள் மூலம் தொடர்ந்து தொடர்பில் இருப்பதாகவும் தெரிவித்தனர். இருப்பினும் மனஅழுத்தம் நிலவுவதாகவும் அவர்கள் குறிப்பிட்டுள்ளனர்.
