உலகளாவிய எரிசக்தி சந்தையில் ஏற்பட்டுள்ள திடீர் நெருக்கடியின் விளைவாக, இந்தியாவின் எரிவாயு விநியோகத்தில் சிக்கல் ஏற்பட்டுள்ளது.இந்தியாவின் முன்னணி எரிவாயு சந்தைப்படுத்தல் நிறுவனங்களான கேயில் மற்றும் இந்திய எண்ணெய் கூட்டுத்தாபனம் ஆகியவை தொழிற்சாலைகளுக்கான எரிவாயு விநியோகத்தை 10 சதவீதம் முதல் 30 சதவீதம் வரை குறைத்துள்ளன.
இந்தியாவின் மிகப்பெரிய திரவ இயற்கை எரிவாயு இறக்குமதி நிறுவனம் விநியோகத் தட்டுப்பாடு தொடர்பில் ஏனைய நிறுவனங்களுக்கு முன்கூட்டியே அறிவித்துள்ளதாகத் தகவல் வெளியாகியுள்ளது.உலகின் முன்னணி திரவ இயற்கை எரிவாயு உற்பத்தி நாடான கத்தார் மீது நடத்தப்பட்ட ஆளில்லா விமானத் தாக்குதலைத் தொடர்ந்து, அந்நாட்டில் உற்பத்தி தற்காலிகமாக பாதிக்கப்பட்டதாக தெரிவிக்கப்படுகிறது.
திரவ இயற்கை எரிவாயு இறக்குமதியில் உலகின் நான்காவது பெரிய நாடாக இந்தியா திகழ்கிறது. கத்தாரிலிருந்துஅதிகளவில் எரிவாயுவை பெற்றுவரும் இரண்டாவது பெரிய நாடாகவும் இந்தியா குறிப்பிடப்படுகிறது.பற்றாக்குறையை சமாளிக்கும் வகையில், சம்பந்தப்பட்ட நிறுவனங்கள் அவசரகால அடிப்படையில் உடனடி கொள்முதல் நடைமுறையின் மூலம் எரிவாயுவை வாங்கத் திட்டமிட்டுள்ளன.
தற்போதைய போர்ச் சூழ்நிலை காரணமாக சர்வதேச சந்தையில் எரிவாயு விலை, கப்பல் போக்குவரத்து செலவு மற்றும் காப்புறுதி கட்டணங்கள் கணிசமாக அதிகரித்துள்ளன.விநியோகக் குறைப்பானது ஒப்பந்தங்களில் குறிப்பிடப்பட்டுள்ள குறைந்தபட்ச வழங்கல் அளவின் அடிப்படையில் மேற்கொள்ளப்பட்டுள்ளதாகத் தெரிவிக்கப்படுகிறது.இதன் மூலம் விநியோக நிறுவனங்கள் வாடிக்கையாளர்களுக்கு அபராதம் செலுத்த வேண்டிய சட்டச் சிக்கல்களில் இருந்து தற்காத்துக் கொள்ள முடியும் எனவும் தகவல்கள் வெளியாகியுள்ளன.
