மகாராஷ்டிர மாநிலம் கட்டோல் பகுதியின் ரவுல்கான் பகுதியில் இயங்கி வரும் எஸ்பிஎல் எனர்ஜி லிமிடெட் தொழிற்சாலையில் நேற்று காலை திடீர் வெடிவிபத்து ஏற்பட்டுள்ளது. சுரங்க மற்றும் தொழில்துறை பயன்பாட்டுக்கான வெடிபொருட்கள் தயாரிக்கும் இத்தொழிற்சாலையின் டெட்டனேட்டர் பொதி பிரிவில் காலை 7 மணி முதல் 7.15 வரை வெடி விபத்து ஏற்பட்டதாக அதிகாரிகள் தெரிவித்துள்ளனர்.
இந்த விபத்தில் இதுவரை 17 பேர் உயிரிழந்துள்ளதாக தெரிவிக்கப்பட்டுள்ளது. மேலும் 18 பேர் காயமடைந்து நாக்பூர் மருத்துவமனையில் சிகிச்சை பெற்று வருகின்றனர். சம்பவ இடத்தில் தேசிய பேரிடர் மீட்புப் படை மற்றும் மாநில பேரிடர் மீட்புப் படை இணைந்து மீட்புப் பணிகளை முன்னெடுத்து வருகின்றன.சம்பவ இடத்துக்கு மாவட்ட ஆட்சியர் மற்றும் காவல் துறை உயரதிகாரிகள் நேரில் சென்று ஆய்வு மேற்கொண்டுள்ளனர். விபத்துக்கான காரணம் குறித்து மேலதிக விசாரணைகள் நடைபெற்று வருகின்றன.
