மார்க் கார்னி நான்கு நாட்கள் அரசு முறைப் பயணமாக இன்று இந்தியா வருகிறார். இந்தியா–கனடா இடையிலான நட்புறவு நீண்டகாலமாக நிலவியிருந்தாலும், ஜஸ்டின் ட்ரூடோ தலைமையிலான ஆட்சிக்காலத்தில் இருநாடுகளுக்கிடையே உறவில் பதற்றம் ஏற்பட்டது.
2023 ஆம் ஆண்டு ஜூன் 18 ஆம் தேதி கனடாவைச் சேர்ந்த காலிஸ்தான் ஆதரவாளர் ஹர்தீப் சிங் நிஜ்ஜார் சுட்டுக் கொல்லப்பட்ட சம்பவத்தில் இந்திய தூதரக அதிகாரிகளுக்கு தொடர்பு இருப்பதாக அப்போது பிரதமராக இருந்த ஜஸ்டின் ட்ரூடோ பகிரங்கமாக குற்றஞ்சாட்டினார். இதனால் இரு நாடுகளுக்கிடையேயான உறவு சிக்கலான நிலைக்கு தள்ளப்பட்டது.
பின்னர் ஆளும் லிபரல் கட்சி உள்ளக எதிர்ப்புகள் அதிகரித்ததையடுத்து, 2025 மார்ச் மாதத்தில் ஜஸ்டின் ட்ரூடோ பிரதமர் பதவியை ராஜினாமா செய்தார். தொடர்ந்து, கட்சியின் மூத்த தலைவர் மார்க் கார்னி புதிய பிரதமராகப் பதவியேற்றார். அதன் பின்னர் இந்தியா–கனடா உறவில் முன்னேற்றம் காணப்பட்டதாக கூறப்படுகிறது.
சில மாதங்களுக்கு முன்பு, இந்திய வம்சாவளியைச் சேர்ந்த கனடா வெளியுறவு அமைச்சர் அனிதா ஆனந்த், டெல்லியில் பிரதமர் நரேந்திர மோடியை சந்தித்து கலந்துரையாடினார்.இந்நிலையில், இன்று மும்பையில் தரையிறங்கும் மார்க் கார்னி, இன்றும் நாளையும் பல்வேறு நிறுவனங்களின் தலைமைச் செயல் அதிகாரிகள் மற்றும் தொழில்துறை நிபுணர்களைச் சந்தித்து கலந்துரையாட உள்ளதாகத் தெரிவிக்கப்பட்டுள்ளது.
