பிஹார் மாநிலம் அராரியா மாவட்டத்தில் நடைபெற்ற சசாஸ்திர சீமா பால் துணை ராணுவப் படை நிகழ்ச்சியில் உரையாற்றிய மத்திய அமைச்சர் அமித் ஷா, மேற்கு வங்கத்தில் நடைபெறவுள்ள சட்டப்பேரவைத் தேர்தலில் பாரதிய ஜனதா கட்சி வெற்றி பெறும் என்ற நம்பிக்கை இருப்பதாக தெரிவித்தார்.
புதிய ஆட்சி அமைந்ததும், அங்குள்ள ஊடுருவல்காரர்கள் வெளியேற்றப்படுவர் என்றும் அவர் கூறினார். அதேபோல், பிஹாரின் சீமாஞ்சல் பகுதியிலும் ஊடுருவல்காரர்களை வெளியேற்றும் நடவடிக்கை தொடங்கப்படும் என குறிப்பிட்டார். கடந்த ஆண்டு நடைபெற்ற பிஹார் தேர்தலில் இதே விடயத்தை முன்வைத்து தான் வெற்றி பெற்றோம் என்றும், எதிர்க்கட்சிகள் விமர்சித்தாலும் மக்கள் ஆதரவு எங்களுக்கே கிடைத்தது என்றும் தெரிவித்தார்.
ஊடுருவலால் ரேஷன் பொருட்கள் விநியோகத்தில் சிக்கல்கள் ஏற்பட்டுள்ளதாகவும், சாதாரண மக்களுக்கு கிடைக்க வேண்டிய நலன்கள் ஊடுருவல்காரர்களுக்குச் செல்கின்றன என்றும் அவர் குற்றஞ்சாட்டினார். மேலும், மக்கள் தொகை எண்ணிக்கையில் மாற்றம் ஏற்பட்டுள்ளதாகவும், இதைச் சரிசெய்வதில் பிரதமர் நரேந்திர மோடி தலைமையிலான அரசு உறுதியாக செயல்படும் என்றும் அமித் ஷா தெரிவித்துள்ளார்.
