முன்னாள் முதலமைச்சர் எடப்பாடி பழனிசாமி மீது சசிகலா கொலை முயற்சி குற்றச்சாட்டு சுமத்துவது கடுமையாகக் கண்டிக்கத்தக்கது என அனைத்திந்திய அண்ணா திராவிட முன்னேற்றக் கழகத்தின் துணைப் பொதுச் செயலாளர் கே.பி. முனிசாமி தெரிவித்துள்ளார்.
கிருஷ்ணகிரி மாவட்டம் ஓசூரில் நடைபெற்ற முன்னாள் முதலமைச்சர் ஜெயலலிதாவின் எழுபத்தெட்டாவது பிறந்த நாள் பொதுக்கூட்டத்தில் உரையாற்றிய அவர், அரசியலில் ஈடுபடமாட்டேன் என எழுத்து மூலம் அறிவித்துவிட்டு மீண்டும் அரசியலுக்கு வந்தவர் சசிகலா என குறிப்பிட்டார்.
“கட்சியின் உழைப்பை பயன்படுத்தி கோடிக்கணக்கான சொத்துகளைச் சேர்த்த குடும்பம் இன்று எடப்பாடி பழனிசாமி மீது கொலை முயற்சி பழி சுமத்துவது ஏற்றுக்கொள்ள முடியாதது. தர்மம் தன் கடமையைச் செய்ததால்தான் அவர் சிறை சென்றார்” என அவர் கூறினார்.
மேலும், கிருஷ்ணகிரி மாவட்டத்தில் கடந்த ஓராண்டில் ஐம்பத்தாறு கொலைச் சம்பவங்கள் இடம்பெற்றுள்ளதாகத் தெரிவித்த அவர், போதைப்பொருட்கள் எளிதில் கிடைப்பதே இளைஞர்கள் வன்முறைகளில் ஈடுபடக் காரணம் என குற்றஞ்சாட்டினார்.
திராவிட முன்னேற்றக் கழகத்தைச் சேர்ந்த ஒருவரின் மகன் சம்பந்தப்பட்டிருப்பதால் கண்காணிப்பு ஒளிப்பதிவு ஆதாரங்களை மறைக்க காவல்துறை முயற்சி செய்கிறது என்றும் தெரிவித்தார்.
அத்துடன், மக்களின் நலனைப் பற்றி சிந்திக்காமல் தனது குடும்ப வருமானம் மற்றும் அடுத்த முதலமைச்சர் பதவி குறித்தே முதலமைச்சர் சிந்தித்து வருகிறார் என்றும் கே.பி. முனிசாமி குற்றஞ்சாட்டினார்.
