தமிழக முன்னாள் முதலமைச்சர் ஜெயலலிதா அவர்களின் எழுபத்தெட்டாவது பிறந்தநாளை முன்னிட்டு, இந்தியப் பிரதமர் நரேந்திர மோடி அவருக்கு புகழாரம் சூட்டியுள்ளார்.இது தொடர்பாக பிரதமர் மோடி தனது சமூக வலைத்தளப் பதிவில், ஜெயலலிதா மனம் கவர்ந்த தலைவராகவும், தலைசிறந்த நிர்வாகியாகவும் மக்களின் இதயங்களில் நீங்கா இடம் பிடித்தவர் எனக் குறிப்பிட்டுள்ளார்.
அவரது வாழ்க்கைப் பயணம் அசாதாரண மனஉறுதி மற்றும் தீர்மானத்தால் அமைந்திருந்ததாகவும் தெரிவித்துள்ளார்.தமிழக முதலமைச்சராக இருந்த காலத்தில் பெண்கள் அதிகாரமளிப்பு, சமூக நீதி மற்றும் அனைத்தையும் உள்ளடக்கிய நலத்திட்டங்களை முன்னிறுத்திய சிறந்த ஆட்சியாளராக அவர் திகழ்ந்ததாகவும் மோடி குறிப்பிட்டுள்ளார்.
கருணை மற்றும் உறுதி ஆகிய இரு பண்புகளையும் ஒருங்கே கொண்ட தலைவராக அவர் விளங்கினார் என்றும் தெரிவித்துள்ளார்.
மேலும், ஜெயலலிதாவுடன் மேற்கொண்ட கலந்துரையாடல்களை மகிழ்ச்சியுடன் நினைவுகூர்வதாகவும், தனது மாதாந்திர வானொலி நிகழ்ச்சியில் அவரைப் பற்றி பகிர்ந்த கருத்துகளையும் இணைத்துள்ளதாகவும் பிரதமர் குறிப்பிட்டுள்ளார்.
இந்நிலையில், ஜெயலலிதா பிறந்தநாளை முன்னிட்டு தமிழகம் முழுவதும் அனைத்திந்திய அண்ணா திராவிட முன்னேற்றக் கழகம் தொண்டர்கள் பல்வேறு நலத்திட்ட உதவிகளை வழங்கி கொண்டாடி வருகின்றனர் என்பது குறிப்பிடத்தக்கது
