ஐக்கிய நாடுகள் சபைக்கு அமெரிக்கா செலுத்த வேண்டிய சுமார் 4 பில்லியன் அமெரிக்க டொலர்களில் சுமார் 160 மில்லியன் டொலர்கள் செலுத்தியுள்ளதாக ஐக்கிய நாடுகள் சபை வியாழக்கிழமை (19) தெரிவித்துள்ளது. இந்த நிதி ஐ.நா.வின் வழக்கமான செயல்பாட்டு வரவு செலவுத் திட்டத்திற்கு ஒதுக்கப்பட்டுள்ளதாக ஐ.நா. செய்தித் தொடர்பாளர் ஸ்டீபன் டுஜாரிக் தெரிவித்தார்.
இதேவேளை, நிதி நெருக்கடியில் உள்ள உலக அமைப்புக்கு ஜனாதிபதி டொனால்ட் ட்ரம்ப் கூடுதல் நிதியை வழங்குவதாக உறுதியளித்துள்ளார். அமெரிக்கா ஐ.நா. பட்ஜெட்டில் மிகப்பெரிய பங்களிப்பாளராக இருப்பினும், ட்ரம்ப் நிர்வாகத்தின் கீழ் வழக்கமான மற்றும் அமைதி காக்கும் பட்ஜெட்டுகளுக்கு பணம் செலுத்த மறுத்துவிட்டது. மேலும், ஐ.நா. நிறுவனங்களுக்கு அவர்களின் சொந்த பட்ஜெட்டுடன் தன்னார்வ நிதியையும் குறைத்துள்ளது.
2026 பெப்ரவரி தொடக்கத்தில் அமெரிக்கா வழக்கமான ஐ.நா. பட்ஜெட்டுக்கு 2.19 பில்லியன் டொலர்கள் கடன்பட்டுள்ளதாக அதிகாரிகள் கூறியுள்ளனர். இது உலகளவில் நாடுகள் செலுத்த வேண்டிய மொத்தக் கடனில் 95% க்கும் அதிகமாகும். தற்போதைய மற்றும் கடந்த கால அமைதி காக்கும் பணிகளுக்காக மேலும் 2.4 பில்லியன் டொலர்கள், ஐ.நா. அமைப்பின் கீழ் இயங்கும் சர்வதேச நீதிமன்றங்களுக்கு 43.6 மில்லியன் டொலர்கள் கடன்பட்டுள்ளதாகவும் தெரிவிக்கப்பட்டுள்ளது.
