பாகிஸ்தானின் வடமேற்கு மாகாணமான கைபர் பக்துன்க்வாவின் பஜௌர் மாவட்டத்தில் இடம்பெற்ற தற்கொலைத் தாக்குதலில் பதினொரு பாதுகாப்புப் படையினரும் ஒரு குழந்தையும் உயிரிழந்துள்ளனர் என பாகிஸ்தான் இராணுவம் தெரிவித்துள்ளது.
பஜௌர் பகுதியில் அமைந்திருந்த பாதுகாப்புச் சோதனைச் சாவடியை நோக்கி வெடிபொருட்கள் நிரப்பப்பட்ட வாகனம் செலுத்தப்பட்டு வெடிக்கச் செய்யப்பட்டதன் விளைவாக இந்த உயிரிழப்புகள் ஏற்பட்டுள்ளதாக அங்குள்ள பொலிஸ் அதிகாரி ஜாபர் கான் ஊடகங்களுக்கு தெரிவித்துள்ளார்.
இக் குண்டுவெடிப்பின் தாக்கத்தால் அருகிலிருந்த கட்டடம் ஒன்று இடிந்து விழுந்ததில் ஒரு பெண் உயிரிழந்ததாகவும் அவர் குறிப்பிட்டுள்ளார்.இதற்கு முன்னதாக, ஆப்கானிஸ்தான் எல்லைக்கு அண்மையில் அமைந்துள்ள கைபர் பக்துன்க்வா மாகாணத்தின் பன்னு மாவட்டத்தில் உள்ள பொலிஸ் நிலைய நுழைவாயிலுக்கு அருகில் நிறுத்தப்பட்டிருந்த மோட்டார் சைக்கிளில் பொருத்தப்பட்டிருந்த வெடிபொருள் வெடித்ததில் இரண்டு பேர் உயிரிழந்திருந்தனர்.
பன்னு மாவட்டத்தில் இடம்பெற்ற தாக்குதலில் பதினேழு பேர் காயமடைந்துள்ளதாக அதிகாரிகள் தெரிவித்துள்ளனர். தற்கொலை குண்டுதாரி ஒருவர் வெடிபொருள் நிரப்பப்பட்ட வாகனத்தை மாவட்டத்திலுள்ள சமயக் கல்வியகச் சுவரில் மோதச் செய்து வெடிக்கச் செய்ததாகவும், அதன் விளைவாகவே உயிரிழப்புகளும் காயங்களும் ஏற்பட்டுள்ளதாகவும் தெரிவிக்கப்பட்டுள்ளது.
