பிரான்சின் தென் மாவட்டங்களை கடும் புயல் தாக்கி வருகிறது. இதையடுத்து இன்று நான்கு மாவட்டங்களுக்கு அதிகபட்சமான ‘சிவப்பு’ எச்சரிக்கையும், 32 மாவட்டங்களுக்கு ‘செம்மஞ்சள்’ எச்சரிக்கையும் விடுக்கப்பட்டுள்ளன.சற்று முன் கிடைத்த தகவலின்படி, Landes நகரில் கனரக வாகனம் ஒன்றின் மீது மரம் முறிந்து விழுந்ததில் சாரதி ஒருவர் உயிரிழந்துள்ளார். இந்தச் சம்பவம் இன்று காலை இடம்பெற்றதாக தெரிவிக்கப்படுகிறது.
தொடர்ச்சியான கனமழை, வெள்ளப்பெருக்கு மற்றும் பலத்த காற்று காரணமாக Gironde மற்றும் Lot-et-Garonne மாவட்டங்களுக்கு சிவப்பு எச்சரிக்கை அறிவிக்கப்பட்டுள்ளது. மேலும் மணிக்கு 160 கிலோமீட்டர் வேகத்தில் வீசும் பலத்த சூறாவளி காரணமாக Aude மாவட்டத்துக்கும், பனிச்சரிவு அபாயம் காரணமாக Savoie மாவட்டத்துக்கும் சிவப்பு எச்சரிக்கை விடுக்கப்பட்டுள்ளது.
புயலின் தாக்கத்தால் மின் விநியோகம் பாதிக்கப்பட்டு, சுமார் 8 இலட்சத்து 50 ஆயிரம் வீடுகள் இருளில் மூழ்கியுள்ளதாக மின் விநியோக நிறுவனம் Enedis தெரிவித்துள்ளது. இதில் Nouvelle-Aquitaine பகுதியில் 4 இலட்சத்து 85 ஆயிரம் வீடுகளும், Occitanie பகுதியில் 3 இலட்சத்து 18 ஆயிரம் வீடுகளும் அடங்குகின்றன.Aude மாவட்டத்தில் உள்ள அனைத்து பாடசாலைகளும் இன்று மூடப்பட்டுள்ளன.
பொதுமக்களின் பாதுகாப்பை கருத்தில் கொண்டு பூங்காக்கள், பொதுத் தோட்டங்கள் மற்றும் கல்லறைகளும் தற்காலிகமாக மூடப்பட்டுள்ளன.அவசர சேவைப் பிரிவுகள் எச்சரிக்கையுடன் செயல்பட்டு வருகின்றன. தேவையற்ற பயணங்களை தவிர்க்குமாறு அதிகாரிகள் பொதுமக்களிடம் கேட்டுக்கொண்டுள்ளனர்.
