பங்களாதேஷின் 13ஆவது பாராளுமன்றத் தேர்தலுக்கான வாக்குப்பதிவு இன்று (12) காலை ஆரம்பமாகி மாலை 4.30 மணியுடன் அமைதியாக நிறைவடைந்தது.முன்னாள் பிரதமர் ஷேக் ஹசீனாவின் 15 ஆண்டுகால ஆட்சி முடிவடைந்ததையடுத்து, முகமது யூனஸ் தலைமையிலான இடைக்கால அரசு பொறுப்பேற்ற 18 மாதங்களுக்குப் பின்னர் இத்தேர்தல் நடைபெற்றுள்ளது.தேர்தலை வன்முறை இன்றி நடத்துவதற்காக முன்னெப்போதும் இல்லாத வகையில் சுமார் 10 இலட்சம் பாதுகாப்புப் படையினர் நாடு முழுவதும் பணியில் ஈடுபடுத்தப்பட்டிருந்தனர்.
2024 ஆம் ஆண்டு ஆகஸ்ட் மாதம் மாணவர் போராட்டங்கள் தீவிரமடைந்ததைத் தொடர்ந்து, ஷேக் ஹசீனா தனது பதவியை ராஜினாமா செய்து இந்தியாவில் தஞ்சம் அடைந்தார். போராட்டங்களை அடக்க வன்முறையைப் பயன்படுத்தியதாக அவர் மீது வழக்குகள் நிலுவையில் உள்ளன. இதன் காரணமாக அவரது அவாமி லீக் கட்சிக்கு இத்தேர்தலில் போட்டியிடத் தடை விதிக்கப்பட்டுள்ளது.
அதனால், முன்னாள் பிரதமர் கலிதா ஜியாவின் மகன் தாரிக் ரஹ்மான் தலைமையிலான பங்களாதேஷ் தேசியவாதக் கட்சி (பி.என்.பி) மற்றும் அதன் முன்னாள் கூட்டணிக் கட்சியான ஜமாத்-ஏ-இஸ்லாமி ஆகியவற்றுக்கு இடையே நேரடி போட்டி நிலவியது.பாராளுமன்றத்தின் 300 இடங்களுக்கு தேர்தல் அறிவிக்கப்பட்டிருந்தது.
எனினும், ஒரு வேட்பாளரின் மறைவால் ஒரு தொகுதியில் தேர்தல் ஒத்திவைக்கப்பட்டதால், 299 தொகுதிகளில் வாக்குப்பதிவு நடைபெற்றது.50 அரசியல் கட்சிகளைச் சேர்ந்த 1,755 வேட்பாளர்கள் மற்றும் 273 சுயேட்சை வேட்பாளர்கள் தேர்தலில் களமிறங்கினர்.
நாடு முழுவதும் அமைக்கப்பட்டிருந்த 42,659 வாக்குச்சாவடிகளில் 24,000 இடங்கள் பதற்றமானவையாக அடையாளம் காணப்பட்டிருந்தன. பாதுகாப்பு ஏற்பாடுகளின் ஒரு பகுதியாக 90 சதவீத வாக்குச்சாவடிகளில் கண்காணிப்பு காமெராக்கள் பொருத்தப்பட்டிருந்தன.மேலும், 45 நாடுகளைச் சேர்ந்த சர்வதேச பிரதிநிதிகள் தேர்தல் செயல்முறைகளை கண்காணித்தனர்.இதனுடன், 84 அம்சங்களை உள்ளடக்கிய ‘ஜூலை தேசிய சாசனம் 2025’ தொடர்பான மக்கள் வாக்கெடுப்பும் ஒரே நேரத்தில் நடத்தப்பட்டமை குறிப்பிடத்தக்கது.
