ரஷ்யாவில் இந்தியர் ஒருவரைச் சேர்த்து எட்டு பேர் கத்திக்குத்து தாக்குதலில் காயமடைந்துள்ளனர். இந்தச் சம்பவம் தொடர்பில் ஒருவரை காவல்துறையினர் கைது செய்துள்ளதாக அதிகாரிகள் தெரிவித்துள்ளனர்.ரஷ்யாவின் பேஷ்கோர்டோஸ்டான் குடியரசின் தலைநகரமான உஃபா நகரில் அமைந்துள்ள அரசு மருத்துவப் பல்கலைக்கழக வளாகத்திற்குள் இந்த தாக்குதல் இடம்பெற்றுள்ளது.
தகவலின்படி, பல்கலைக்கழக வளாகத்திற்குள் நுழைந்த சந்தேகநபர் தன்னிடமிருந்த கத்தியால் அங்கிருந்த மாணவர்களை குறிவைத்து தாக்குதல் நடத்தியுள்ளார். சம்பவம் குறித்து தகவல் அறிந்த காவல்துறையினர் உடனடியாக சம்பவ இடத்துக்கு விரைந்து சென்றுள்ளனர்.சந்தேகநபரை கைது செய்ய முயன்றபோது, அவர் காவல்துறையினரையும் தாக்கியதாக தெரிவிக்கப்படுகிறது. பின்னர், அவர் தன்னைத்தானே கத்தியால் காயப்படுத்திக் கொண்டதாகவும் கூறப்படுகிறது.
இதையடுத்து, காவல்துறையினர் அவரை கட்டுப்பாட்டுக்குள் கொண்டு வந்து மருத்துவமனைக்கு அனுப்பி வைத்துள்ளனர். உடலின் பல பகுதிகளில் காயமடைந்த நிலையில், அவர் தீவிர சிகிச்சைப் பிரிவில் அனுமதிக்கப்பட்டுள்ளதாக அதிகாரிகள் தெரிவித்துள்ளனர்.இந்தச் சம்பவம் தொடர்பில் வழக்குப் பதிவு செய்யப்பட்டு, தாக்குதலுக்கான காரணம் மற்றும் பின்னணி குறித்து விரிவான விசாரணைகள் முன்னெடுக்கப்பட்டு வருகின்றன. மாணவர்களை குறிவைத்து மேற்கொள்ளப்பட்ட இந்தக் கொலைவெறித் தாக்குதலின் நோக்கம் என்ன என்பது தொடர்பிலும் அதிகாரிகள் தீவிரமாக விசாரித்து வருகின்றனர்.
