அமெரிக்கா மற்றும் கனடா இடையிலான பாதுகாப்பு தொடர்பான உறவுகளில் புதிய பதற்றம் உருவாகியுள்ளது.கனடாவுக்கான அமெரிக்க தூதுவர் பீட் ஹூக்ஸ்ட்ரா வெளியிட்ட கருத்தே இந்த பதற்றத்திற்கு காரணமாக அமைந்துள்ளது.அவர், “கனடா F-35 வகை போர் விமானங்களை வாங்க மறுத்தால், கனடாவின் வான்வெளியை பாதுகாப்பதற்காக அமெரிக்கா தனது போர் விமானங்களை இயக்க வேண்டிய நிலை உருவாகும்” என தெரிவித்திருந்தார்.
இந்தக் கருத்தைத் தொடர்ந்து, இரு நாடுகளுக்கிடையிலான பாதுகாப்பு உறவுகள் குறித்து கனடாவில் பரவலான விவாதம் எழுந்துள்ளது.கனடா அரசு 2023 ஆம் ஆண்டு, 88 F-35 போர் விமானங்களை வாங்குவதற்காக 19 பில்லியன் அமெரிக்க டொலர் பெறுமதியான ஒப்பந்தத்தில் கையெழுத்திட்டிருந்தது.இந்த ஒப்பந்தத்தின் கீழ், 16 போர் விமானங்களுக்கு பணம் செலுத்தப்பட்டு, அவை 2026 ஆம் ஆண்டில் வழங்கப்படவிருந்தன.
எனினும், அமெரிக்க ஜனாதிபதி டொனால்ட் ட்ரம்ப் விதித்த வரி அச்சுறுத்தல்களைத் தொடர்ந்து, இந்த ஒப்பந்தத்தை மீளாய்வு செய்ய கனடா தீர்மானித்துள்ளதாக தகவல்கள் வெளியாகியுள்ளன.
இதன் பின்னணியில், கனடா மாற்று வழியாக ஸ்வீடன் நாட்டின் Saab நிறுவனத்திடமிருந்து 72 Gripen E வகை போர் விமானங்களையும், 6 GlobalEye கண்காணிப்பு விமானங்களையும் வாங்கும் வாய்ப்பை ஆராய்ந்து வருவதாகத் தெரிவிக்கப்படுகிறது.இந்த நிலைமை, வட அமெரிக்க பாதுகாப்பு ஏற்பாடுகளில் புதிய அரசியல் மற்றும் இராணுவ மாற்றங்களை உருவாக்கக்கூடும் என அரசியல் ஆய்வாளர்கள் சுட்டிக்காட்டுகின்றனர்.
