பாகிஸ்தான் வெளியுறவு அமைச்சரும் பங்களாதேஷ் வெளியுறவு அமைச்சரும் நேற்று (25) தொலைபேசியில் தொடர்புகொண்டு இருதரப்பு உறவை மேம்படுத்த உறுதிபூண்டதாக பாகிஸ்தான் தரப்பில் வெளியிடப்பட்ட அறிவிப்பில் கூறப்பட்டுள்ளது.
கடந்த 2024 ஒகஸ்ட் மாதம் பங்களாதேஷத்தில் பிரதமர் ஷேக் ஹசீனாவின் ஆட்சி கவிழ்ந்த பிறகு, பாகிஸ்தானும், பங்களாதேஷும் மிகுந்த நெருக்கம் காட்டி வருகின்றன. அரசியல் மற்றும் இராணுவத் தலைவா்கள் அவ்வப்போது சந்தித்துப் பேசி வருகின்றனர். அதே நேரத்தில் பங்களாதேஷத்தில் ஹிந்துக்களுக்கு எதிரான வன்முறையும், இந்திய எதிர்ப்பு போக்கும் அதிகரித்துள்ளது.இந்நிலையில், இரு நாட்டு வெளியுறவு அமைச்சர்களும் நேற்று தொலைபேசியில் தொடர்புகொண்டு பேசினர். அப்போது, வர்த்தகம், பொருளாதார ஒத்துழைப்பு, பிராந்திய, சர்வதேச அரசியல் சூழல் குறித்தும் விவாதித்தனர்.
இரு நாடுகள் இடையே பல்வேறு துறைகளிலும் ஒத்துழைப்பு அதிகரிப்பது, தொடர்ந்து இணக்கமாகச் செயல்பட்டு இரு தரப்பு உறவை மேலும் உறுதிப்படுத்த இரு தலைவர்களும் ஒப்புக்கொண்டதாக பாகிஸ்தான் வெளியுறவு அமைச்சக செய்திக் குறிப்பில் தெரிவிக்கப்பட்டுள்ளது.
