ஈரானில் கடந்த வாரம் அரசுக்கு எதிரான போராட்டத்தில் ஈடுபட்ட எர்பான் சொல்தானி என்பவர் பொலிஸாரால் கைது செய்யப்பட்ட நிலையில், அவர் எந்தவிதமான முறையான விசாரணைகளுமின்றி இன்று (14) தூக்கில் இடப்படுகிறார்.
இந்நிலையில், ‘எர்பானுக்கு மரண தண்டனை விதிக்கப்பட்டுள்ளது என அவரது குடும்பத்தினருக்கு தெரிவிக்கப்பட்டுவிட்டது. ஜனவரி 14இல் தண்டனை நிறைவேற்றப்படும் என தெரிவிக்கப்பட்டுவிட்டது’ என நோர்வே நாட்டை அடிப்படையாகக் கொண்ட ஈரான் மனித உரிமைகள் அமைப்பு வெளியிட்ட செய்தியில் குறிப்பிடப்பட்டுள்ளது.
ஈரானின் விடுதலைக்கு குரல் கொடுத்தது மட்டுமே அவரது குற்றம் எனக் குறிப்பிட்டு எர்பானின் மரண தண்டனையை தடுத்து நிறுத்தும்படி சர்வதேச சமூகத்துக்கு ஈரானின் பல்வேறு மனித உரிமை குழுக்களும் அழைப்பு விடுத்துள்ளன. இந்நிலையில் அவர் கடவுளுக்கு எதிராக போர் செய்கிறார் என குற்றச்சாட்டு பதிவாகியுள்ளதோடு, அவர் தரப்பில் வாதிடுவதற்கு வழக்கறிஞரின் அனுமதியும் மறுக்கப்பட்டுள்ளமை குறிப்பிடத்தக்கது.
