உள்ளடக்கத்திற்குச் செல்க
நவம்பர் 2026
21 சனி
4210 பேர் இப்போது பார்க்கின்றனர்

இலங்கைக்கான அமெரிக்காவின் கண்காணிப்பு மென்மேலும் தீவிரமடையக் கூடும்!

இலங்கை செய்திகள் 7 மணி நேரம் முன்
141 பார்வைகள்

அமெரிக்க நாடாளுமன்றத்தில் ஜனநாயகக் கட்சியினரின் ஆதிக்கம் அதிகரிப்பது, இலங்கையின் மனித உரிமைகள் நிலை, வர்த்தகச் சலுகைகள் மற்றும் வொசிங்டனுடனான இராஜதந்திர உறவுகள் மீதான கண்காணிப்பை மென்மேலும் தீவிரப்படுத்தக்கூடும் என்று இலங்கைக்கான முன்னாள் அமெரிக்கத் தூதுவர் றொபேர்ட் ஓ. பிளாக் எச்சரித்துள்ளார்.

‘அமெரிக்கத் தேர்தல் மற்றும் தெற்காசியாவின் மாற்றங்கள்: இலங்கை மற்றும் பிராந்தியத்திற்கான தாக்கங்கள்’ என்ற தலைப்பில் ‘பாத்பைண்டர் பவுண்டேசன்’ நடத்திய இணையவழிக் கலந்துரையாடலில் உரையாற்றியபோதே அவர் இதனைத் தெரிவித்துள்ளார்.

அமெரிக்க நாடாளுமன்றத்தின் பிரதிநிதிகள் சபை மற்றும் செனட் சபையில் ஜனநாயகக் கட்சியினர் பெரும்பான்மை பெறுவது, ட்ரம்ப் நிர்வாகத்தின் வெளியுறவு மற்றும் வர்த்தகக் கொள்கைகளைச் செயற்படுத்தும் அரசியல் சூழலை மாற்றக்கூடும். இதனால் இலங்கைக்குப் புதிய வாய்ப்புகள் உருவாகினாலும், மனித உரிமைகள், வர்த்தகம் மற்றும் இராஜதந்திர விவகாரங்களில் சவால்களும் அதிகரிக்கலாம் என்று அவர் குறிப்பிட்டுள்ளார்.

ஈரான் தொடர்பான மோதல் மற்றும் அமெரிக்காவின் வரி விதிப்புக் கொள்கைகள் இலங்கையின் பொருளாதாரத்தில் தாக்கத்தை ஏற்படுத்தக்கூடிய முக்கிய காரணிகளாக உள்ளன. குறிப்பாக, இலங்கையின் ஏற்றுமதிக்கு அமெரிக்கச் சந்தை முக்கியத்துவம் வாய்ந்ததாக இருப்பதால், சர்வதேச வர்த்தகத் தடைகள் அல்லது சந்தை வாய்ப்புகள் குறைவது பொருளாதார மீட்சியைப் பாதிக்கலாம்.

இலங்கைக்கு விஜயம் செய்திருந்தபோது பிரதமர் ஹரிணி அமரசூரிய, வெளிவிவகார அமைச்சர் உள்ளிட்ட அதிகாரிகளைச் சந்தித்ததாகக் குறிப்பிட்டுள்ள அவர், சுற்றுலா, வெளிநாட்டுப் பண அனுப்பல்கள் மற்றும் தேயிலை ஏற்றுமதி ஓரளவு நிலையானதாக இருந்தாலும், பணவீக்கம் மற்றும் பொருளாதார வளர்ச்சிக் குறைவு கவலைக்குரியதாக இருப்பதாகவும் தெரிவித்துள்ளார்.

ஈரான் மோதல் விரைவில் முடிவுக்கு வரும் என எதிர்பார்க்கவில்லை என்று குறிப்பிட்டுள்ள அவர், ஹோர்முஸ் நீரிணை மீதான கட்டுப்பாடு, ஈரானின் அணுசக்தித் திட்டம் மற்றும் பிராந்திய ஆயுதக் குழுக்களுக்கான ஆதரவு உள்ளிட்ட விவகாரங்கள் இன்னும் தீர்க்கப்படாமல் உள்ளதாகவும் சுட்டிக்காட்டியுள்ளார்.

இந்த மோதல் தொடர்பாக அமெரிக்க நாடாளுமன்றத்தில் ஜனநாயகக் கட்சியினர் தமது சட்டமியற்றும் மற்றும் கண்காணிப்பு அதிகாரங்களைப் பயன்படுத்தி ட்ரம்ப் நிர்வாகத்தின் மீது அழுத்தம் கொடுக்க முடியும். இராணுவச் செலவுகள், உயிரிழப்புகள் மற்றும் பிராந்தியத்தில் அமெரிக்க இராணுவக் கட்டமைப்புகளுக்கு ஏற்பட்ட சேதங்கள் தொடர்பாக விசாரணைகளை முன்னெடுக்கவும் வாய்ப்புள்ளதாகவும் அவர் தெரிவித்துள்ளார்.

எனினும், வர்த்தகக் கொள்கைகளில் ஜனநாயகக் கட்சியினர் ட்ரம்பின் வரி விதிப்புகளை முழுமையாக நீக்குவார்கள் என எதிர்பார்க்க முடியாது. முன்னைய ட்ரம்ப் நிர்வாகத்தின் பல வர்த்தக நடவடிக்கைகளையும் பைடன் நிர்வாகம் தொடர்ந்திருந்ததை அவர் நினைவூட்டியுள்ளார்.

இலங்கையைப் பொறுத்தவரையில், பொது முன்னுரிமை முறைமை வர்த்தகச் சலுகையின் எதிர்காலம் முக்கியமானதாகும். 2020ஆம் ஆண்டு முதல் செயலற்ற நிலையில் உள்ள இந்தத் திட்டம் மீண்டும் நடைமுறைப்படுத்தப்பட்டால், தொழிலாளர் உரிமைகள், சுற்றுச்சூழல் தரநிலைகள் மற்றும் மனித உரிமைகள் தொடர்பான கடுமையான நிபந்தனைகள் விதிக்கப்படலாம். இதனால் அமெரிக்கச் சந்தையில் முன்னுரிமை அணுகலைப் பெறுவதற்கான இலங்கையின் முயற்சிகள் சிக்கல்களை எதிர்கொள்ளக்கூடும் என்றும் அவர் கூறியுள்ளார்.

இந்தச் சூழலில், வொசிங்டனுடனான இராஜதந்திர உறவுகளை வலுப்படுத்த இலங்கை புதிய அமெரிக்கத் தூதுவரை நியமிப்பது அவசியம் என்றும், அமெரிக்க நிர்வாகம் மற்றும் நாடாளுமன்றம் ஆகிய இரு தரப்புடனும் தீவிரமாகச் செயற்படக்கூடிய பிரதிநிதி தேவை என்றும் அவர் வலியுறுத்தியுள்ளார்.

மேலும், பயங்கரவாதத் தடைச் சட்டத்தை இரத்துச் செய்வது, நல்லிணக்க நடவடிக்கைகளை முன்னெடுப்பது, வடக்கு மற்றும் கிழக்கில் இராணுவமயமாக்கலைக் குறைப்பது, காணிகளை மீள ஒப்படைப்பது மற்றும் அதிகாரப் பரவலாக்கத்தை முன்னெடுப்பது போன்ற விடயங்கள் இலங்கையின் சர்வதேச உறவுகளை மேம்படுத்துவதில் முக்கிய பங்கு வகிக்கக்கூடும் என்றும் அவர் சுட்டிக்காட்டியுள்ளார்.

இலங்கையின் வொசிங்டனுடனான உறவுகள் இனி இராஜதந்திர மற்றும் வர்த்தகப் பேச்சுவார்த்தைகளுக்கு மட்டும் மட்டுப்படுத்தப்பட முடியாது. மனித உரிமைகள், தொழிலாளர் தரநிலைகள் மற்றும் பிராந்தியப் பாதுகாப்பு தொடர்பான அமெரிக்க நாடாளுமன்றத்தின் அணுகுமுறைகள், பொருளாதார ஒத்துழைப்புக்கான சூழலைத் தீர்மானிக்கக்கூடும்.

எனவே, அமெரிக்காவில் மாறிவரும் அரசியல் சூழல் இலங்கைக்குப் புதிய வாய்ப்புகளை உருவாக்கினாலும், உள்நாட்டுச் சீர்திருத்தங்கள் மற்றும் உறுதிமொழிகளை நடைமுறைப்படுத்துவதன் அவசியத்தையும் அதிகரிக்கின்றது என்றும் முன்னாள் அமெரிக்கத் தூதுவர் றொபேர்ட் ஓ. பிளாக் மேலும் தெரிவித்துள்ளார்.

உள்நாட்டு மற்றும் வெளிநாட்டு செய்திகளை உடனுக்குடன் அறிந்துகொள்ள WHATSAPP CHANNEL இணையுங்கள்
மேலும் செய்திகளைப் படிக்க இங்கே அழுத்தவும்

விளம்பரம்

தொடர்புடைய செய்திகள் NEW

இலங்கை செய்திகள்

நிந்தவூர் கடலில் காணாமல் போன இளைஞர்கள் இருவரையும் தேடும் பணிகள் தீவிரம்!

அம்பாறை மாவட்டம், நிந்தவூர் கடற்கரையில் இன்று (20) மதியம் கடலில் நீராடச் சென்றவர்களில் திடீரென அலையில் இழுத்துச் செல்லப்பட்டவர்களுள் ஒருவர் உயிருடன் மீட்கப்பட்டு அம்பாறை பொது வைத்தியசாலையின்…

136 0 0
இலங்கை செய்திகள்

மோட்டார் சைக்கிளும் லொறியும் மோதி கோர விபத்து: 23 வயது இளைஞன் உயி@ரிழப்பு

அம்பாறை மாவட்டம், சம்மாந்துறை பொலிஸ் பிரிவிற்குட்பட்ட மல்வத்தைப் பகுதியில் இன்று (20) வெள்ளிக்கிழமை மாலை இடம்பெற்ற மோட்டார் சைக்கிள் மற்றும் லொறி ஆகியன மோதிய கோர விபத்தில்…

127 0 0
இலங்கை செய்திகள்

மூச்சுத் திணறல் காரணமாக 36 மாணவர்கள் வைத்தியசாலையில் அனுமதி!

மூச்சுத் திணறல் காரணமாக மஸ்கெலியா புனித ஜோசப் தேசிய பாடசாலையின் 36 மாணவர்கள் இன்று (20) மஸ்கெலியா பிரதேச வைத்தியசாலையில் அனுமதிக்கப்பட்டுள்ளனர். இன்று (20) காலை 8.45…

123 0 0
இலங்கை செய்திகள்

யாழில். திறந்தவெளியில் குப்பை எரிப்பு – நீதிமன்றில் விரிவான அறிக்கை சமர்ப்பிக்கப்படும் என அறிவிப்பு

யாழ்ப்பாணம் மாநகர சபை அதிகார எல்லைக்குள் திறந்தவெளியில் குப்பைகள் எரிக்கப்படுவது தொடர்பிலான விரிவான அறிக்கையொன்றை எதிர்வரும் காலத்தில் நீதிமன்றத்தில் சமர்ப்பிக்கவுள்ளதாக, அந்நகர சபையின் சார்பில் ஆஜரான சட்டத்தரணி…

133 0 0