மாவட்ட ஆட்சியருக்கு ஆபாச குறுஞ்செய்தி : தவெக எம்.எல்.ஏயை கைது செய்யுமாறு எடப்பாடி வலியுறுத்தல்!
கள்ளக்குறிச்சி மாவட்ட ஆட்சியருக்கு ஆபாச குறுஞ்செய்தி அனுப்பிய தவெக சட்டமன்ற உறுப்பினரை உடனடியாக கைது செய்யுமாறு எடப்பாடி பழனிச்சாமி வலியுறுத்தியுள்ளார்.
அதிமுக பொதுச்செயலாளர் எடப்பாடி பழனிசாமி நேற்று வெளியிட்டுள்ள சமூகவலைதள பதிவு:
கள்ளக்குறிச்சி மாவட்ட ஆட்சியருக்கு தவெக கள்ளக்குறிச்சி எம்எல்ஏ அருள் விக்னேஷ் ஆபாச குறுஞ்செய்தி அனுப்பியதாகவும், மதுபோதையில் ஆட்சியரின் வீட்டிற்கே சென்று தொல்லை அளித்ததாகவும் வருகின்ற செய்தி மிகுந்த அதிர்ச்சி அளிக்கிறது.
ஆட்சியருக்கே பாதுகாப்பு இல்லை; அதுவும் ஆளுங்கட்சி சட்டமன்ற உறுப்பினரிடம் இருந்தே. கேவலம் தமிழ்நாடு முதல்வர் விஜய் அவர்களே.
ஒரு மாவட்டத்தின் ஆட்சியர், அம்மாவட்டத்தின் நிர்வாக நீதிபதியும் ஆவார். அவருக்கே நீதி இல்லை என்றால், இதற்கு என்ன பதில் சொல்லப் போகிறார்? தமிழ முதல்வர்.
பதில் என்று ஏதாவது உங்களிடம் இருந்து முதலில் வருமா? ‘உள்ளாடையுடன் நிற்கவைப்பேன்’ என்று மிரட்டும் அமைச்சர், மனு கொடுக்க வந்தவரை தாக்கி ‘ஆபாச அர்ச்சனை’ செய்து அதை மறைக்க முயலும் துணை சபாநாயகர், எல்லாவற்றிற்கும் மேலாக ‘ஆட்சியருக்கே ஆபாச மெசேஜ்’ அனுப்பிய எம்எல்ஏ என்று தவெக கட்சியை சேர்ந்தோர் சட்டம் ஒழுங்கை காக்கும் லட்சணம் பல்லிளித்துக் கொண்டிருக்கிறது.
தங்கள் கட்சியினர் தவறு செய்தால் வாய்மூடி மவுனியாக இருக்கும் அரசு, மற்ற கட்சியினர் செய்திருந்தால் இன்று அனைத்து மைக்குகள் முன்னரும் so called spokespersons எவ்வளவு பேசியிருப்பர்?
நூலிழையில் தொங்கிக் கொண்டிருக்கும் தனது ஆட்சியை காப்பற்றிக் கொள்ள, எம்எல்ஏ மீது நடவடிக்கை எடுக்க முதல்வர் பயப்படுகிறாரா? வாக்களித்த மக்களின் பாதுகாப்பை விட, முதலமைச்சர் நாற்காலி தான் விஜய்க்கு முக்கியமென்று கருதுகிறாரா?
பாலியல் வழக்கு ஒன்றில் தொடர்பு இருந்ததாக ஸ்ரீவைகுண்டம் தவெக எம்எல்ஏ விஜய் சரவணன் மீது வழக்கே பதியாமல், அவருக்கு சட்டமன்றத்திலேயே ‘Good Conduct Certificate’ அளித்து வழக்கை இழுத்து மூடியது.
அதே Formula-வை அருள் விக்னேஷுக்கும் பயன்படுத்தப்போகிறதா இந்த அரசு? ஒரு ஆட்சியாளராக மாவட்ட ஆட்சியருக்கு நடந்த இந்த கொடுமைக்கு எதிராக வழக்கு பதிந்து தன் கட்சி எம்எல்ஏவை கைது செய்ய வேண்டும்.
நேர்மையான, அரசியல் குறுக்கீடற்ற விசாரணை நடத்தப்படுவதை உறுதி செய்ய வேண்டும். செய்வீர்களா முதல்வர் விஜய் அவர்களே? இவ்வாறு அவர் கூறியுள்ளார்.
