உலக தடகள ஆண்டின் சிறந்த வீரர் விருதுப் பரிந்துரையில் ருமேஷ் தரங்கவிற்கு 8ஆவது இடம்!
ஈட்டி எறிதல் போட்டியில் வெளிப்படுத்திய மிகச்சிறந்த திறமை காரணமாக ‘உலக தடகள ஆண்டின் சிறந்த வீரர் (World Athletics Athlete of the Year) விருதிற்கான பரிந்துரைகளில் ருமேஷ் தரங்க 8ஆவது இடத்தைப் பெற்றுள்ளார்.
அண்மையில் நிறைவடைந்த பல சர்வதேசப் போட்டிகளில் மிகச்சிறந்த திறமைகளை ருமேஷ் வௌிப்படுத்தியிருந்தார்.
இதன்படி, 2026ஆம் ஆண்டின் ஆசிய விளையாட்டு போட்டி மற்றும் பொதுநலவாய விளையாட்டு போட்டிகள் ஆகிய இரண்டிலும் தங்கப் பதக்கங்களை வெல்ல முடிந்ததுடன், டைமண்ட் லீக் (Diamond League) செம்பியன் பட்டத்தையும் அவர் கைப்பற்றினார்.
இது தவிர, 92.62 மீற்றர் தூரம் எறிந்து தனது தனிப்பட்ட சிறந்த திறமையைப் பதிவு செய்ததோடு, புதிய தேசிய சாதனையையும் அவர் படைத்தார்.
இந்த மகத்தான வெற்றியுடன் உலக தடகள விருது விழாவின் முக்கிய பெயர்களுக்குள் நுழைந்த முதல் இலங்கையர் என்ற வரலாற்றுச் சாதனையை ருமேஷ் தரங்க படைத்துள்ளார்.
இலங்கை விமானப்படையைப் பிரதிநிதித்துவப்படுத்தும் இந்தத் திறமையான வீரரின் இந்த வெற்றி, முழு நாட்டிற்கும் பெருமை சேர்த்துள்ளதோடு, உலக தடகள அரங்கில் இலங்கையின் பெயரை உயர்த்திப் பிடித்த ஒரு விசேட மைல்கல்லாகவும் கருதப்படுகிறது.
