லிந்துலை, ஹோல்றூட் கொனன் தோட்டத்தில் நேற்று திங்கட்கிழமை (09) மாலை 5:40 மணியளவில் ஏற்பட்ட பயங்கர இடி மின்னல் தாக்கத்தினால் குடியிருப்பு வீடு ஒன்று கடுமையாகச் சேதமடைந்துள்ளது.
மின்னல் தாக்கத்தினால் வீட்டின் முன்பகுதியில் இருந்த மின் இணைப்புப் பெட்டி முற்றிலும் தீப்பிடித்து எரிந்துள்ளது.
வீட்டின் கூரை பலத்த காற்று மற்றும் மின்னலின் வேகத்தால் தூக்கி வீசப்பட்டதுடன், அதன் பகுதிகள் படுக்கையில் உறங்கிக் கொண்டிருந்தவர்கள் மீது விழுந்துள்ளன.
வீட்டிலிருந்த பல இலட்சம் ரூபாய் மதிப்புள்ள மின்சார உபகரணங்கள் அனைத்தும் முற்றிலும் செயலிழந்து சேதமடைந்துள்ளதுடன் ஆடைகள் மற்றும் இதர வீட்டு உபயோகப் பொருட்களும் நாலாப்புறமும் தூக்கி வீசப்பட்டு, சில பொருட்கள் தீப்பிடித்துச் சேதமடைந்துள்ளன.
சம்பவம் நடந்த வேளையில் வீட்டினுள் இருந்த குடும்பத்தினர் சிறு காயங்களுடன் அதிர்ஷ்டவசமாக உயிர் தப்பியுள்ளதாகத் தெரிவிக்கப்படுகிறது.
இச்சம்பவம் தொடர்பான மேலதிக விசாரணைகளை லிந்துலை பொலிஸார் மேற்கொண்டு வருகின்றனர்.
