நச்சுப் புகை மூட்டத்தில் சிக்கியுள்ள டெல்லி : வெளியில் செல்ல அச்சப்படும் மக்கள்!

டெல்லி-தேசிய தலைநகர் பகுதியில் செவ்வாய்க்கிழமை (10) அன்று, நச்சுத்தன்மை வாய்ந்த காற்றைச் சமாளிக்கப் போராடி வருகிறது. 

அங்கு காற்றின் தரம் தொடர்ந்து மிகவும் மோசமான (very poor) நிலையில் நீடிக்கிறது; பல கண்காணிப்பு நிலையங்களில் காற்றின் தரக் குறியீடு (AQI) “தீவிரமான” (severe) அளவைத் தாண்டியுள்ளது. 

தலைநகர் முழுவதும் நிலவும் குறைந்த பார்வைத்திறன் சூழலை மேலும் மோசமாக்கியுள்ளது. 

வானிலை முன்னறிவிப்பைப் பொறுத்தவரை, விரைவில் நிலைமை சீரடைவதற்கான அறிகுறிகள் ஏதும் தென்படவில்லை. 

இதற்கிடையில், அடர்ந்த புகைமூட்டம் நகரத்தை முழுமையாகச் சூழ்ந்திருக்க, கடந்த ஐந்து ஆண்டுகளில் இல்லாத அளவுக்கு, இந்த தீபாவளி பண்டிகையின் போது தலைநகர் டெல்லியில் காற்று மாசுபாடு மிக மோசமான அளவை எட்டியுள்ளது.

சாந்தினி சௌக்கில் காற்றுத் தரக் குறியீடு 400 ஆகப் பதிவாகியிருந்தது. 

இதற்கு அடுத்ததாக பூசா பகுதியில் 398 ஆகவும், ஜஃபர்பூரில் உள்ள நேதாஜி சுபாஷ் தொழில்நுட்பப் பல்கலைக்கழக (NSUT) பகுதியில் 384 ஆகவும், காமன்வெல்த் விளையாட்டு வளாகத்தில் 380 ஆகவும் பதிவாகியிருந்தது.

மத்திய மாசுக் கட்டுப்பாட்டு வாரியத்தின் (CPCB) தரவுகளின்படி, இந்தியா கேட் – கர்தவ்யா பாதை பகுதியில் ஒப்பீட்டளவில் குறைந்த அளவாக 258 ஆகக் காற்றுத் தரக் குறியீடு பதிவாகியிருந்தது.

எனினும், டெல்லியின் ஏனைய பல பகுதிகளில் காற்று மாசுபாட்டின் நிலை மிகவும் மோசமாகக் காணப்பட்டது.

சிரிபோர்ட் பகுதியில் காற்றுத் தரக் குறியீடு 375 ஆகவும், தல்கடோரா பூங்கா பகுதியில் 373 ஆகவும் பதிவாகியுள்ளது. 

மதுரா வீதியில் 372 ஆகவும், டெல்லி இந்திய தொழில்நுட்பக் கழக (IIT) பகுதியில் 361 ஆகவும் பதிவாகியுள்ளது.

அதேவேளை, ஆயா நகர் பகுதியில் 360 ஆகவும், புராரி பகுதியில் 350 ஐத் தாண்டியும், ஷாதிப்பூர் பகுதியில் 325 ஆகவும் காற்றுத் தரக் குறியீடு பதிவாகியுள்ளது.

இந்திய வானிலை ஆய்வு மையத்தின் (IMD) தகவல்படி, நவம்பர் 15 ஆம் திகதி வரை டெல்லியில் காற்று மாசுபாட்டிலிருந்து நிவாரணம் கிடைக்க வாய்ப்பில்லை. 

வறண்ட வானிலை காரணமாக, காற்று மாசு துகள்கள் காற்றில் தங்கியிருக்கும் என்றும், இதனால் தலைநகர் மற்றும் அதனைச் சுற்றியுள்ள பகுதிகளில் காற்று மாசுபாட்டின் அளவு அதிகமாகவே நீடிக்கும் என்றும் எதிர்பார்க்கப்படுகிறது.

மேற்கு இமயமலைப் பகுதியில் ‘மேற்கத்திய இடையூறு’ (Western Disturbance) காரணமாக செவ்வாய்க்கிழமை இரவு முதல் மழை பெய்யக்கூடும் என்று வானிலை ஆய்வு மையம் கணித்துள்ளது.

இருப்பினும், இது டெல்லி-தேசிய தலைநகர் (Delhi-NCR) பகுதியை பாதிக்க வாய்ப்பில்லை. 

நவம்பர் 15-ஆம் திகதி வரை, அதிகபட்ச வெப்பநிலை 27-30 டிகிரி செல்சியஸாகவும், குறைந்தபட்ச வெப்பநிலை 14-17 டிகிரி செல்சியஸாகவும் இருக்கும் என்று இந்திய வானிலை ஆய்வு மையம் கணித்துள்ளது.

தலைநகரின் அண்மைய அளவீடுகள், கடந்த ஐந்து ஆண்டுகளில் இல்லாத அளவுக்கு மிகவும் மாசுபட்ட தீபாவளியைத் தொடர்ந்து வந்துள்ளன. 

ஞாயிற்றுக்கிழமை (08), டெல்லியின் சராசரி காற்றின் தரக் குறியீடு (AQI) 376-ஐ எட்டியது. 

தேசிய தலைநகரில், ஒரு நாள் முன்னதாக ஒட்டுமொத்த காற்றின் தரக் குறியீடு 371 ஆகப் பதிவானது. 

இது 2021-ஆம் ஆண்டிற்குப் பிறகு தீபாவளிக்குப் பிந்தைய ஒரு நாளில் பதிவான மிக உயர்ந்த அளவாகும்.

அடுத்த சில நாட்களில் டெல்லியில் கடுமையான காற்று மாசுபாடு ஏற்பட வாய்ப்புள்ளது என காற்றின் தர முன் எச்சரிக்கை அமைப்பு (EWS) எச்சரித்துள்ளது. 

மோசமான வானிலை, வாகனப் புகை, தீபாவளி கொண்டாட்டங்கள் மற்றும் அண்டை மாநிலங்களில் பருவகாலமாக அதிகரித்துள்ள பயிர்க்கழிவு எரிப்பு ஆகியவை மாசுபாட்டின் சுமையை மேலும் அதிகரிக்கும் என எதிர்பார்க்கப்படுகிறது.