சவூதி அரேபியாவின் ஆதரவுடன் செயல்படும் யேமன் அரசாங்கம், செங்கடல் கரையோரப் பகுதிகளில் முக்கிய இராணுவ நடவடிக்கையை ஆரம்பித்துள்ளதாக அறிவித்துள்ளது.
பொப் அல்-மந்தப் நீரிணை முதல் மொக்கா நகரம் வரையிலான பகுதிகளில் இந்த நடவடிக்கை முன்னெடுக்கப்படுவதாகவும், கடந்த மாதம் ஈரான் ஆதரவு ஹூதி கிளர்ச்சியாளர்களால் கைப்பற்றப்பட்ட பகுதிகளை மீண்டும் கைப்பற்றுவதே இதன் நோக்கம் எனவும் தெரிவிக்கப்பட்டுள்ளது.
இந்த இராணுவ நடவடிக்கையின் போது செங்கடல் கரையோரப் பிராந்தியத்தின் பெரும்பாலான பகுதிகளில் இருந்து ஹூதி கிளர்ச்சியாளர்களை விரட்டியடித்துள்ளதாக யேமன் அதிகாரிகள் தெரிவித்துள்ளனர்.
இதனிடையே, ரியாத்தில் உள்ள கிங் காலித் சர்வதேச வானூர்தி நிலையம், ராபிக் பகுதியில் உள்ள அராம்கோ எண்ணெய் சுத்திகரிப்பு நிலையம், அப்ஹா சர்வதேச வானூர்தி நிலையம் மற்றும் கமீஸ் முஷைத் இராணுவத் தளம் உள்ளிட்ட முக்கிய இலக்குகள் மீது தாக்குதல் நடத்தியதாக ஹூதி கிளர்ச்சியாளர்கள் பொறுப்பேற்றுள்ளதாக தகவல்கள் தெரிவிக்கின்றன.
