முன்னாள் அமைச்சர் பந்துல குணவர்தன இலஞ்ச ஊழல் ஆணைக்குழுவில் ஆஜர்

முன்னாள் அமைச்சர் பந்துல குணவர்தன இன்று காலை லஞ்ச ஊழல் விசாரணை ஆணைக்குழுவில் ஆஜரானார்.

இன்று அவர் கொழும்பு, ஜாவத்தை வீதியிலுள்ள லஞ்ச ஊழல் ஆணைக்குழுவின் தலைமை அலுவலகத்திற்கு வருகை தந்தார்.

கடந்த 2007 ஆம் ஆண்டு அமைச்சரவை ஒப்புதல் வழங்கப்பட்ட சம்பவம் ஒன்று தொடர்பில் வாக்குமூலம் வழங்குவதற்காகவே அவர் இவ்வாறு ஆணைக்குழுவிற்கு அழைக்கப்பட்டிருந்தார்.

2007 ஆம் காலப்பகுதியில் வர்த்தக, நுகர்வோர் விவகாரங்கள் மற்றும் கூட்டுறவு அபிவிருத்தி அமைச்சராக பந்துல குணவர்தன பதவி வகித்த காலத்தில் எடுக்கப்பட்ட குறிப்பிட்ட சில அமைச்சரவைத் தீர்மானங்கள் மற்றும் அது தொடர்பான நிதி நடைமுறைகள் குறித்து எழுந்த புகார்களின் அடிப்படையிலேயே இந்த விசாரணை நடத்தப்பட்டு வருகிறது.

குறித்த அமைச்சரவை முடிவு தொடர்பாக அவரிடம் பல மணிநேரம் லஞ்ச ஊழல் ஆணைக்குழுவின் அதிகாரிகளால் வாக்குமூலம் பதிவு செய்யப்பட்டது.

நாட்டில் இடம்பெற்ற கடந்தகால நிதி முறைகேடுகள் மற்றும் சட்டவிரோத தீர்மானங்கள் குறித்து லஞ்ச ஊழல் ஆணைக்குழு முன்னெடுத்து வரும் விரிவான விசாரணைகளின் ஒரு அங்கமாகவே இந்த அழைப்பு விடுக்கப்பட்டுள்ளதாக தகவல்கள் தெரிவிக்கின்றன.