மன்னார் மாவட்ட சிறுவர், பெண்கள் அபிவிருத்தி குழு, சமூக உளநலம், போதை தடுப்பு மன்றக் கூட்டம் இன்று செவ்வாய்க்கிழமை காலை 10.30 மணியளவில் மன்னார் மாவட்ட செயலக கேட்போர் கூடத்தில் மாவட்ட அரசாங்க அதிபர் க.கனகேஸ்வரன் தலைமையில் இடம்பெற்றது.
குறித்த கூட்டத்தில் பல்வேறு விடயங்கள் குறித்து ஆராயப்பட்டது.
இதன்போது, சிறுவர் மற்றும் பெண்கள் பிரிவினால் நடைமுறைப்படுத்தப்பட்டு வரும் வேலைத்திட்டங்களின் முன்னேற்றம் தொடர்பாக ஆராயப்பட்டதுடன், பாடசாலை இடைவிலகல், சிறுவர் மற்றும் பெண்கள் எதிர்கொள்ளும் பிரச்சினைகள், போதைப்பொருள் பாவனையால் ஏற்படும் பாதிப்புகள் மற்றும் அதனை தடுப்பதற்கான நடவடிக்கைகள் உள்ளிட்ட பல்வேறு முக்கிய விடயங்கள் தொடர்பில் விரிவாக கலந்துரையாடப்பட்டது.
மேலும், சிறுவர் மற்றும் பெண்களின் பாதுகாப்பையும் நலனையும் உறுதிப்படுத்துவதற்காக சம்பந்தப்பட்ட திணைக்களங்கள் மற்றும் நிறுவனங்களுக்கிடையிலான ஒருங்கிணைந்த முறையில் முன்னெடுக்க வேண்டிய நடவடிக்கைகள் குறித்து கவனம் செலுத்தப்பட்டது.
இக்கூட்டத்தில் மேலதிக மாவட்ட செயலாளர் எம்.பிரதீப், கல்வித் திணைக்கள அதிகாரிகள், சுகாதாரத் துறை அதிகாரிகள், சிறுவர் மற்றும் பெண்கள் பொலிஸ் பிரிவினர், சிறுவர் நன்னடத்தை உத்தியோகத்தர்கள், தொழில் திணைக்கள அதிகாரிகள், பிரதேச செயலகங்களின் சிறுவர் மற்றும் பெண்கள் பிரிவு உத்தியோகத்தர்கள், மதுவரித் திணைக்கள அதிகாரிகள் மற்றும் அரச சார்பற்ற நிறுவனங்களின் பிரதிநிதிகள் உள்ளிட்ட பல்வேறு தரப்பினர் கலந்து கொண்டனர்.
