அமெரிக்க ஜனாதிபதி டொனால்ட் ட்ரம்பின் அழைப்பின் பேரில், சீன ஜனாதிபதி ஷீ ஜின்பிங் எதிர்வரும் 23 ஆம் திகதி முதல் 25 ஆம் திகதி வரை அமெரிக்காவுக்கு உத்தியோகபூர்வ பயணம் மேற்கொள்ளவுள்ளதாகச் சீன வெளியுறவு அமைச்சு அறிவித்துள்ளது.
இந்தப் பயணத்தின் போது, சீனா – அமெரிக்க உறவுகள், உலக அமைதி மற்றும் வளர்ச்சி சார்ந்த முக்கிய விவகாரங்கள் குறித்து ஜனாதிபதி டொனால்ட் ட்ரம்புடன் ஷீ ஜின்பிங் ஆழமான கருத்துப் பரிமாற்றங்களை மேற்கொள்வார் எனச் சீன வெளியுறவு அமைச்சின் ஊடகப் பேச்சாளர் குவோ ஜியாகுன் தெரிவித்துள்ளார்.
ஆறு மாத காலப்பகுதிக்குள் இரு நாட்டுத் தலைவர்களும் பரஸ்பரமாக மேற்கொண்ட இந்த விஜயங்கள் வரலாற்றுச் சிறப்புமிக்க திருப்புமுனையாகக் கருதப்படுவதாகச் சீன வெளியுறவு அமைச்சின் பேச்சாளர் சுட்டிக்காட்டியுள்ளார்.
அமெரிக்காவுடன் இணைந்து உரையாடல் மற்றும் ஒத்துழைப்பை வலுப்படுத்தவும், கருத்து வேறுபாடுகளைச் சரியாகக் கையாளவும், இரு நாட்டு மக்களின் நலனை மேம்படுத்துவதோடு உலக அமைதி, ஸ்திரத்தன்மை மற்றும் செழிப்பை ஊக்குவிக்கவும் சீனா தயாராக உள்ளதாக அவர் மேலும் தெரிவித்துள்ளார்.
