வங்காள விரிகுடாவின் ஆழ்கடல் பகுதிகளில் பயணிக்கும் பலநாள் மீன்பிடி படகுகளுக்கு வளிமண்டலவியல் திணைக்களத்தினால் சிவப்பு எச்சரிக்கை விடுக்கப்பட்டுள்ளது.
கிழக்கு மத்திய வங்காள விரிகுடா மற்றும் அதனை ஒட்டிய வடக்கு அந்தமான் கடல் பகுதிக்கு மேலாக நிலவும் குறைந்த காற்றழுத்த தாழ்வு மண்டலம், மேற்கு நோக்கி நகர்ந்து வடமேற்கு திசையை நோக்கி நகர்ந்து வருவதாகத் திணைக்களம் தெரிவித்துள்ளது.
இது இன்று திங்கட்கிழமை (21) காற்றழுத்தத் தாழ்வு மண்டலமாகவும், நாளை (22) செவ்வாய்க்கிழமை தீவிர காற்றழுத்தத் தாழ்வு மண்டலமாகவும் வளர்ச்சியடைய அதிக வாய்ப்புள்ளதாகவும், 23 ஆம் திகதியளவில் இது வடக்கு ஆந்திரப் பிரதேசம் மற்றும் தெற்கு ஒடிசா கடற்கரையை ஒட்டிய வங்காள விரிகுடா பகுதியை அடையும் என எதிர்பார்க்கப்படுகிறது.
குறித்த கடற்பகுதிகளில் காற்றின் வேகம் மணிக்கு 55 முதல் 65 கிலோமீற்றர் வரை அவ்வப்போது அதிகரிக்கக்கூடுவதுடன், கடல் கொந்தளிப்பாகவோ அல்லது மிகவும் கொந்தளிப்பாகவோ காணப்படும்.
அத்துடன், இடிமின்னலுடன் கூடிய பலத்த மழையின் போது காற்றின் வேகம் மணிக்கு 70 கிலோமீற்றர் வரை அதிகரிக்கக்கூடும் எனவும் எச்சரிக்கை விடுக்கப்பட்டுள்ளது.
இதற்கமைய, மறு அறிவித்தல் வரை குறித்த கடற்பகுதிகளில் மீன்பிடி மற்றும் கடற்போக்குவரத்து நடவடிக்கைகளில் ஈடுபடுவதைத் தவிர்க்குமாறும், ஏற்கனவே அப்பகுதிகளில் தங்கியுள்ள மீன்பிடிப் படகுகளை பாதுகாப்பான கடற்பகுதிகளை நோக்கி நகர்த்துமாறும் வளிமண்டலவியல் திணைக்களம் அறிவுறுத்தியுள்ளது.
