போலந்து எல்லைக்கு மிக அருகில் ரஷ்யா நடத்திய ஆளில்லா வானூர்தி தாக்குதல்களைத் தொடர்ந்து யுக்ரைனுக்குக் கூடுதல் ஆதரவு அளிக்கப்படும் என நேட்டோ அமைப்பின் தலைமைச் செயலாளர் மார்க் ரூட்டே (Mark Rutte) உறுதி அளித்துள்ளார்.
யுக்ரைனுக்கு ஆதரவளிப்பதில் இருந்து 32 நாடுகள் அடங்கிய நேட்டோ கூட்டணி பின்வாங்காது என்றும் ரஷ்யாவுடனான தனது கிழக்கு எல்லையில் தற்காப்பை வலுப்படுத்தும் என்றும் அவர் தெரிவித்துள்ளார்.
முன்னதாக யுக்ரைன்-போலந்து எல்லைக்கு அருகில் பயணித்த தொடருந்து ஒன்றின் மீது ரஷ்ய ஆளில்லா வானூர்திகள் தாக்குதல் நடத்தின.
பிரித்தானிய முன்னாள் பிரதமர் போரிஸ் ஜோன்சன் மற்றும் முன்னாள் சுவீடன் பிரதமர் காரல் பில்ட் ஆகியோர அடங்கிய தூதுக்குழு அந்த தொடருந்து நிலையத்தைக் கடந்து சென்ற சில நிமிடங்களில் இந்த தாக்குதல் நடத்தப்பட்டுள்ளது.
இந்தநிலையில், நேட்டோ எல்லைக்கு அருகில் நடத்தப்பட்ட இந்த தாக்குதல் புடினின் பயத்தையும் மேற்கத்திய நாடுகளிடையே அச்சத்தை ஏற்படுத்த நினைக்கும் எண்ணத்தையுமே காட்டுகிறது என்று நேட்டோவின் தலைமைச் செயலாளர் குறிப்பிட்டுள்ளார்
இதற்கிடையில், யுக்ரைனும் ரஷ்யாவும் பரஸ்பரம் ஒருவரின் எரிசக்தி உள்கட்டமைப்புகள் மீது தாக்குதல் நடத்துவதில்லை என ஒப்புக்கொண்டுள்ளதாக அமெரிக்க ஜனாதிபதி டொனால்ட் ட்ரம்ப் சமூக வலைதளத்தில் பதிவிட்டுள்ளார்.
ஆனால் இதை ரஷ்யாவோ அல்லது யுக்ரைனோ அதிகாரப்பூர்வமாக உறுதிப்படுத்தவில்லை.
