ஈரானுடனான போர் எதிர்வரும் நவம்பர் மாத இடைக்காலத் தேர்தலுக்குப் பின்னரே முடிவுக்கு வரும் என்றும், அதுவரை மசகு எண்ணெய் விலை குறையாது என்றும் அமெரிக்க ஜனாதிபதி டொனால்ட் ட்ரம்ப் தெரிவித்துள்ளார்.
அமெரிக்காவுக்கும் ஈரானுக்கும் இடையிலான போர் ஏழாவது மாதத்தை எட்டியுள்ள நிலையில், மத்திய கிழக்குப் பகுதியில் மோதல்கள் தீவிரமடைந்துள்ளன.
புதன்கிழமை அன்று எண்ணெய் விநியோகச் சங்கிலிகள் பாதிக்கப்பட்டு மசகு எண்ணெய் விலை ஒரு பீப்பாய் 100 டொலராக உயர்ந்ததை அடுத்து ஜனாதிபதி ட்ரம்ப் இந்தக் கருத்துகளைப் பகிர்ந்துள்ளார்.
டெக்சாஸ் மாகாணத்தில் நடைபெறவுள்ள குடியரசுக் கட்சியின் இடைக்காலத் தேர்தல் மாநாட்டிற்காகப் புறப்பட்ட ட்ரம்பை செய்தியாளர்கள் சந்தித்துப் பேசினர்.
அப்போது பேசிய அவர், “ஈரானியர்களால் அதற்கு மேல் தாக்குதலைத் தாக்குப் பிடிக்க முடியாது என்பதால், தேர்தல் முடிந்த உடனேயே போர் முடிவுக்கு வரும், அதைத் தொடர்ந்து மசகு எண்ணெய் விலையும் சரியத் தொடங்கும்” என்றார்.
இதற்கிடையே, அமெரிக்கப் படைகள் ஈரானுடன் தொடர்புடைய ஐந்து எண்ணெய் தாங்கிக் கப்பல்களைத் தாக்கியுள்ளன.
பதிலுக்கு ஈரானும் ஹோர்முஸ் நீரிணையில் தாக்குதல்களை நடத்தியுள்ளதால் உலகளாவிய எரிபொருள் விலை உயர்ந்துள்ளதுடன், அமெரிக்காவில் பணவீக்கம் மற்றும் வட்டி விகிதங்கள் குறித்த கவலைகளும் எழுந்துள்ளன.
போர் காரணமாக எரிபொருள் முதல் அன்றாடப் பொருட்கள் வரை விலை உயர்ந்துள்ளதால் ட்ரம்ப்பின் செல்வாக்கு சரிந்து வரும் சூழலில், வரவிருக்கும் இடைக்காலத் தேர்தல்கள் அமெரிக்க அரசியலில் திருப்புமுனையாக அமையும் என்று அரசியல் ஆய்வாளர்கள் நம்பிக்கை வெளியிட்டுள்ளனர்.
