ஹோர்முஸ் நீரிணையில் அமையும் கப்பல் போக்குவரத்துப் பாதையின் புவியியல் பண்புகள் குறித்து ஈரானும் ஓமானும் உடன்பாட்டிற்கு வந்துள்ளதாக ஈரான் வெளிவிவகார அமைச்சின் பேச்சாளர் இஸ்மாயில் பகெய் (Esmaeil Baghaei) தெரிவித்துள்ளார்.
இது தொடர்பான கூட்டறிக்கை இறுதி செய்யப்பட்டு வருவதாகவும் அவர் குறிப்பிட்டார்.
உடன்பாடு எட்டப்பட்ட போதிலும், அது பாதுகாப்பான போக்குவரத்துக்குத் தாமாகவே உத்தரவாதம் அளித்துவிடாது என குறிப்பிட்டுள்ள அவர், அப்பகுதியில் அமெரிக்கா மேற்கொள்ளும் இராணுவ நடவடிக்கைகள் இன்னமும் அதன் பாதுகாப்பைக் குலைக்கும் வகையில் அமையக்கூடும் என்றும் எச்சரித்துள்ளார்.
ஈரான் வெளியுறவு அமைச்சின் டெலிகிராம் பக்கத்தில் பகிர்ந்துள்ள கருத்துக்களில், ஹோர்முஸ் நீரிணையில் பாதுகாப்பின்மைக்குக் காரணமான பல காரணிகள் இன்னமும் நிலவுவதாக இஸ்மாயில் பகாய் சுட்டிக்காட்டியுள்ளார்.
ஈரானுக்கு எதிராக அமெரிக்கா அறிவித்துள்ள கடற்படை முற்றுகை மற்றும் “ஈரானுக்கும் அதன் நலன்களுக்கும் எதிரான ஏனைய ஆக்கிரமிப்பு மற்றும் அச்சுறுத்தல் நடவடிக்கைகள்” ஆகியவற்றை இதற்குச் சான்றாக அவர் மேற்கோள் காட்டியுள்ளார்.
