கடந்த மாதம் ஹிஸ்புல்லாவுடன் போர் நிறுத்தத்திற்கு ஒப்புக்கொண்ட பின்னர், இஸ்ரேல் புதன்கிழமை 6 ஆம் திகதி அன்று பெய்ரூட் மீது முதல் முறையாகத் தாக்குதல் நடத்தியது.
நகரின் தெற்கு புறநகர்ப் பகுதிகளில், அந்தப் போராளிக் குழுவின் உயர் ரத்வான் படையின் தளபதி ஒருவரை இலக்கு வைத்து தாக்குதல் நடத்தியதாக இஸ்ரேல் கூறியுள்ளது.இஸ்ரேலியப் பிரதமர் பெஞ்சமின் நெதன்யாகு மற்றும் பாதுகாப்பு அமைச்சர் இஸ்ரேல் காட்ஸ் ஆகியோர் கூட்டறிக்கை ஒன்றில் இந்த நடவடிக்கையை அறிவித்தனர்.
இந்தத் தாக்குதலில் ஹிஸ்புல்லாவின் தளபதி கொல்லப்பட்டதாக இஸ்ரேலிய ஊடகங்கள் செய்தி வெளியிட்டன.
ஆனால் இஸ்ரேலிய இராணுவம் அல்லது ஹிஸ்புல்லா தரப்பிலிருந்து உடனடியாக எந்த உறுதிப்படுத்தலும் வரவில்லை.லெபனான் போர்நிறுத்தம், ஒரு பரந்த அமெரிக்க-ஈரான் போர் நிறுத்தத்திற்கு அடித்தளமாக அமைந்துள்ளது. லெபனானில் இஸ்ரேலியத் தாக்குதல்களை நிறுத்துவது ஈரானின் முக்கியக் கோரிக்கையாகும்.
ஈரானும் அமெரிக்காவும் தங்கள் மோதலை நிறுத்துவதற்கான ஒரு ஒப்பந்தத்தை நெருங்கி வருவதாகக் கூறிவரும் நிலையில், பெய்ரூட் மீதான இஸ்ரேலியத் தாக்குதல்களை நிறுத்திய போர்நிறுத்தத்திற்கு இந்தத் தாக்குதல்கள் அச்சுறுத்தலாக உள்ளன.
லிட்டானி நதிக்குத் தெற்கே உள்ள பகுதிகளில் இஸ்ரேலியப் படைகள் நிலைநிறுத்தப்பட்டுள்ளன, மேலும் தெற்கு லெபனானில் தாக்குதல்கள் தொடர்கின்றன.
ஈரானின் பங்காளியான ஹிஸ்புல்லா, இஸ்ரேலியப் படையினரை நோக்கித் துப்பாக்கிச் சூடு நடத்தியும், ஆயுதம் ஏந்திய ஆளில்லா விமானங்களை ஏவியும் பதிலடி கொடுத்துள்ளது.
புதன்கிழமை முன்னதாக, லிட்டானி நதிக்கு வடக்கே உள்ள பல கிராமங்களில் வசிப்பவர்களை வெளியேறுமாறு இஸ்ரேல் அழைப்பு விடுத்தது; இது இஸ்ரேலின் செயல்பாட்டு மண்டலத்தின் விரிவாக்கத்தைக் குறிப்பதாக அமைந்துள்ளது.
