இரண்டு மாத காலப் போரை முடிவுக்குக் கொண்டுவர பேச்சுவார்த்தை நடத்த ஈரான் விரும்பினால், அவர்கள் தொலைபேசியில் தொடர்பு கொள்ளலாம் என்று அமெரிக்க ஜனாதிபதி டொனால்ட்ட்ரம்ப் கூறினார்.
அதேநேரம், ஜனாதிபதி விளாடிமிர் புட்டினின் ஆதரவைக் கோருவதற்காக தெஹ்ரானின் வெளிவிவகார அமைச்சர் இன்று 27 ஆம் திகதி ரஷ்யாவில் தரையிறங்கினார்.
சனிக்கிழமையன்று, ட்ரம்ப் தனது தூதர்களான ஸ்டீவ் விட்காஃப் மற்றும் ஜாரெட் குஷ்னர் ஆகியோரின் இஸ்லாமாபாத் பயணத்தை இரத்து செய்தபோது, சமாதான முயற்சிகளை மீண்டும் தொடங்குவதற்கான நம்பிக்கைகள் மங்கின.
ஈரானிய வெளிவிவகார அமைச்சர் அப்பாஸ் அராக்சி, ஞாயிற்றுக்கிழமையன்று மத்தியஸ்தர்களான பாகிஸ்தான் மற்றும் ஓமானுக்குச் சென்று வந்த பின்னர் ரஷ்யாவிற்குப் புறப்பட்டனர்.
ஈரானின் அணுசக்தி லட்சியங்கள் மற்றும் முக்கியத்துவம் வாய்ந்த ஹார்முஸ் நீரிணை வழியாக அணுகல் உள்ளிட்ட பிரச்சினைகளில் இரு தரப்பினரும் இன்னும் வெகு தொலைவில் இருப்பதாகத் தெரிகிறது.
வார இறுதியில் அமெரிக்க-ஈரான் அமைதிப் பேச்சுவார்த்தைகள் முடங்கி, வளைகுடாப் பகுதி கப்பல் போக்குவரத்து தடைபட்டதைத் தொடர்ந்து, திங்கட்கிழமை காலை ஆசிய வர்த்தகத்தில் எண்ணெய் விலைகள் உயர்ந்தன மற்றும் அமெரிக்கப் பங்கு எதிர்கால ஒப்பந்தங்கள் சரிவைச் சந்தித்தன.
உலகளாவிய அளவுகோலான பிரென்ட் எண்ணெய், ஒரு பீப்பாய்க்கு கிட்டத்தட்ட 2% உயர்ந்து $107.26 (£79.25) ஆக இருந்தது. அதே நேரத்தில், அமெரிக்காவில் வர்த்தகம் செய்யப்படும் மசகு எண்ணெய் 1% உயர்ந்து $95.40 ஆக இருந்தது.
பெப்ரவரி 28 அன்று ஈரான் மீது அமெரிக்க-இஸ்ரேல் நடத்திய தாக்குதல்களுடன் தொடங்கிய இந்த மோதலில், ஒரு போர் நிறுத்தம் முழு அளவிலான சண்டையை இடைநிறுத்தியிருந்தாலும், ஆயிரக்கணக்கானோரைக் கொன்று, எண்ணெய் விலைகளை உயர்த்தி, பணவீக்கத்தைத் தூண்டி, உலகளாவிய வளர்ச்சிக்கான கண்ணோட்டத்தை இருளாக்கிய இந்தப் போரை முடிவுக்குக் கொண்டுவருவதற்கான நிபந்தனைகள் குறித்து எந்த உடன்பாடும் எட்டப்படவில்லை.
