ரயான்ஏயர் (Ryanair), விமான நிலைய செக்-இன் (Check-in) நேர நடைமுறையில் அதிரடி மாற்றம்!
பிரித்தானியாவின் பிரபல குறைந்த கட்டண விமான நிறுவனமான ரயான்ஏயர் (Ryanair), விமான நிலைய செக்-இன் (Check-in) நேர நடைமுறையில் அதிரடி மாற்றத்தை அறிவித்துள்ளது.
விமானப் பயணிகள் விமான நிலையப் பாதுகாப்பு சோதனைகள் மற்றும் பாஸ்போர்ட் வரிசைகளை எளிதாகக் கடப்பதற்கு ஏதுவாக, தனது செக்-இன் மற்றும் பொதி ஒப்படைப்பு (Bag drop) நேரத்தை 20 நிமிடங்கள் முன்கூட்டியே முடிக்க ரயான்ஏயர் நிறுவனம் தீர்மானித்துள்ளது.
தற்போதைய நடைமுறைப்படி, விமானம் புறப்படுவதற்கு 40 நிமிடங்களுக்கு முன்னதாக செக்-இன் கவுண்டர்கள் மூடப்படுகின்றன. ஆனால், புதிய மாற்றத்தின்படி: பயணிகள் விமானம் புறப்படுவதற்கு குறைந்தது 60 நிமிடங்களுக்கு (ஒரு மணிநேரம்) முன்னதாகவே செக்-இன் மற்றும் பொதி ஒப்படைப்புப் பணிகளை முடிக்க வேண்டும்.
இந்த புதிய விதிமுறை எதிர்வரும் நவம்பர் 10 ஆம் திகதி முதல் அமலுக்கு வருகிறது.ஐரோப்பிய ஒன்றியத்தின் புதிய எல்லைக் கட்டுப்பாட்டு முறைமை (EES) காரணமாக, ஐரோப்பிய விமான நிலையங்களில் பயணிகளுக்குப் பல மணிநேர தாமதம் ஏற்படுவதாகக் கூறப்படுகிறது. இதனைச் சமாளிக்கவே இந்த 20 நிமிட கூடுதல் கால அவகாசத்தை நிறுவனம் முன்கூட்டியே திட்டமிட்டுள்ளது.
ரயான்ஏயர் பயணிகளில் சுமார் 20% பேர் இந்த மாற்றத்தால் நேரடியாகப் பாதிக்கப்படுவர்.ஏனையோர் ஆன்லைன் மூலம் செக்-இன் செய்வதால் அவர்களுக்குப் பெரிய பாதிப்பு இருக்காது.சரியான நேரத்திற்கு செக்-இன் செய்யத் தவறும் பயணிகளுக்குப் பணத்தைத் திரும்பப் பெறாமலேயே விமானத்தில் ஏற அனுமதி மறுக்கப்படலாம் (Denied boarding) என நிறுவனம் எச்சரித்துள்ளது.
கோடை கால விடுமுறைப் பயணிகளுக்கு இப்போதைக்கு இந்த மாற்றம் பொருந்தாது என்றாலும், நவம்பர் மாதத்திற்குப் பிறகு பயணம் செய்யத் திட்டமிடுவோர் இந்த ஒரு மணிநேரக் காலக்கெடுவை நினைவில் கொள்ளுமாறு அறிவுறுத்தப்பட்டுள்ளனர்.
