தமிழகத்தில் இருந்து விமானம் மூலம் முட்டைகளை ஏற்றுமதி செய்வதற்கான நடவடிக்கைகள் மேற்கொள்ளப்பட்டு வருவதாக தமிழ்நாட்டு கோழிப் பண்ணையாளர்கள் சங்கம் தெரிவித்துள்ளது.
நாமக்கல்லில் செய்தியாளர்களிடம் பேசிய அச் சங்கத்தின் செயலாளர் சுந்தர்ராஜன், மத்திய கிழக்கு ஆசிய நாடுகளில் நிலவும் போர்ப் பதற்றம் காரணமாக கப்பல் போக்குவரத்து பாதிக்கப்பட்டுள்ளதால் முட்டை ஏற்றுமதியும் குறைந்துள்ளது என்றார்.
“எனவேதான் விமானம் மூலம் முட்டை ஏற்றுமதி செய்வதற்கான நடவடிக்கைகள் மேற்கொள்ளப்பட்டு வருகின்றன. அதேவேளையில் கப்பல்கள் மூலம் ஓரிரு கொள்கலன்களில் முட்டைகள் ஏற்றுமதி நடைபெற்று வருகிறது. போர்ப் பதற்றம் தணிந்தால் முட்டை ஏற்றுமதி சீராகும்,” என்றார் திரு சுந்தர்ராஜன்.
நாமக்கல் வட்டாரங்களில் 1,200க்கும் மேற்பட்ட கோழிப்பண்ணைகள் உள்ளன. நாள்தோறும் ஆறு கோடி முட்டைகள் உற்பத்தி செய்யப்படுகின்றன.
டுபாய், குவைத், கட்டார், ஓமன், பக்ரைன் உள்ளிட்ட பல்வேறு நாடுகளுக்கு கப்பல்களில் நாள்தோறும் 80 லட்சம் முட்டைகள் கொள்கலன்கள் மூலம் ஏற்றுமதி செய்யப்பட்டு வந்தது.
இதனிடையே, கோழிப் பண்ணைகளில் 21 நாள்களுக்கு ஒரு முறை கோழிகளின் ரத்த மாதிரிகள் எடுக்கப்பட்டு ஆய்வுக்கு அனுப்பப்படுவதாகவும் பறவைக் காய்ச்சல் பாதிப்பின்மை காரணமாக ஏற்றுமதி கட்டுப்பாடுகள் இன்றி நடைபெறுவதாகவும் திரு சுந்தர்ராஜன் கூறியுள்ளார்.
