உள்ளடக்கத்திற்குச் செல்க
நவம்பர் 2026
18 புதன்
4210 பேர் இப்போது பார்க்கின்றனர்

ஊர்காவற்றுறை பிரதேச சபையின் 2027ஆம் ஆண்டுக்கான பட்ஜட் தோல்வி!

இலங்கை செய்திகள் 6 மணி நேரம் முன்
91 பார்வைகள்

அகில இலங்கைத் தமிழ்க் காங்கிரஸின் ஆளுகையிலுள்ள ஊர்காவற்றுறை பிரதேச சபையின் 2027ஆம் ஆண்டுக்கான வரவு – செலவுத் திட்டம் மேலதிக 3 வாக்குகளால் தோற்கடிக்கப்பட்டுள்ளது.

ஊர்காவற்றுறை பிரதேச சபையின் 2027ஆம் ஆண்டுக்கான வரவு – செலவுத் திட்டம் இன்று செவ்வாய்க்கிழமை தவிசாளர் அன்னலிங்கம் அன்னராசாவினால் சபையில் சமர்ப்பிக்கப்பட்டு விவாதத்துக்கு எடுத்துக்கொள்ளப்பட்டது.

மொத்தம் 13 உறுப்பினர்களைக் கொண்ட ஊர்காவற்றுறை பிரதேச சபையில் ஈழ மக்கள் ஜனநாயகக் கட்சி (ஈ.பி.டி.பி.) 4 ஆசனங்களையும், அகில இலங்கைத் தமிழ்க் காங்கிரஸ் மற்றும் தேசிய மக்கள் சக்தி ஆகியன தலா 3 ஆசனங்களையும், இலங்கைத் தமிழரசுக் கட்சி 2 ஆசனங்களையும், ஜனநாயகத் தமிழ்த் தேசியக் கூட்டணி ஓர் ஆசனத்தையும் கொண்டுள்ளன.

இந்நிலையில், அகில இலங்கைத் தமிழ்க் காங்கிரஸின் ஆளுகையிலுள்ள இந்தப் பிரதேச சபையின் இரண்டாவது பாதீடு, தவிசாளர் அன்னலிங்கம் அன்னராசா தலைமையில் நடைபெற்ற விசேட சபை அமர்வில் சமர்ப்பிக்கப்பட்டது.

இதன்போது சபையின் வருமானத்தின் ஊடாக முன்னெடுக்கப்படவுள்ள அபிவிருத்தித் திட்டங்கள், நிதியுதவி கோரப்பட்டுள்ள முன்மொழிவுகள், விசேட வருமானத்தை ஈட்டுவதற்கான முயற்சிகள் உள்ளிட்ட பல்வேறு விடயங்கள் மற்றும் திருத்தங்களை உள்ளடக்கியதாக 2027ஆம் ஆண்டுக்கான பாதீடு முன்வைக்கப்பட்டது.

எனினும், பாதீட்டில் உள்ளடக்கப்பட்டுள்ள திட்டங்கள் தொடர்பில் எதிர்க்கட்சி உறுப்பினர்கள் பல்வேறு விமர்சனங்களையும் எதிர்ப்புகளையும் முன்வைத்தனர். குறிப்பாக, நடைமுறைச் சாத்தியமான பல விடயங்கள் உரிய முறையில் கவனத்தில் கொள்ளப்படவில்லை என்று சுட்டிக்காட்டிய உறுப்பினர்கள், பாதீட்டில் காணப்படும் குறைபாடுகள் தொடர்பிலும் கேள்விகளை எழுப்பினர். இதனால் சபையில் பாதீடு தொடர்பாகக் காரசாரமான வாதப் பிரதிவாதங்கள் இடம்பெற்றன.

இதனையடுத்து, நீண்ட விவாதங்களின் பின்னர் 2027ஆம் ஆண்டுக்கான வரவு – செலவுத் திட்டத்தை நிறைவேற்றுவதற்காகத் தவிசாளரினால் வாக்கெடுப்பு நடத்தப்பட்டது. இதன்போது பாதீட்டுக்கு எதிராக 8 வாக்குகளும், ஆதரவாக 5 வாக்குகளும் பதிவாகிய நிலையில், மேலதிக 3 வாக்குகளால் பாதீடு தோற்கடிக்கப்பட்டது.

எதிராக வாக்களித்தோர் (8 வாக்குகள்):

ஈழ மக்கள் ஜனநாயகக் கட்சியின் 4 உறுப்பினர்கள், தேசிய மக்கள் சக்தியின் 3 உறுப்பினர்கள் மற்றும் இலங்கைத் தமிழரசுக் கட்சியின் ஓர் உறுப்பினர்.

ஆதரவாக வாக்களித்தோர் (5 வாக்குகள்):

அகில இலங்கைத் தமிழ்க் காங்கிரஸின் 3 உறுப்பினர்கள், ஜனநாயகத் தமிழ்த் தேசியக் கூட்டணியின் ஓர் உறுப்பினர் மற்றும் இலங்கைத் தமிழரசுக் கட்சியின் ஓர் உறுப்பினர்.

தமிழரசுக் கட்சி உறுப்பினர்களின் முரண்பட்ட வாக்களிப்பும் அடுத்தகட்ட நடவடிக்கையும்

குறிப்பாக, இலங்கைத் தமிழரசுக் கட்சியின் இரண்டு உறுப்பினர்களில் ஒருவர் பாதீட்டுக்கு ஆதரவாகவும் மற்றையவர் எதிராகவும் வாக்களித்தமை சபையில் விசேட கவனத்தைப் பெற்றது.

இதன்படி, அகில இலங்கைத் தமிழ் காங்கிரஸின் ஆளுகையிலுள்ள ஊர்காவற்றுறை பிரதேச சபையின் 2027ஆம் ஆண்டுக்கான பாதீடு பெரும்பான்மை உறுப்பினர்களின் எதிர்ப்பினால் தோற்கடிக்கப்பட்டுள்ளது.

இந்நிலையில், இந்தப் பாதீடு உரிய திருத்தங்களுடன் மீண்டும் 14 நாள்களுக்குள் சபையில் சமர்ப்பிக்கப்படவுள்ளதுடன், இரண்டாவது முறையும் அது தோற்கடிக்கப்பட்டால் உள்ளூராட்சி மன்றச் சட்டத்தின் பிரகாரம் தவிசாளருக்குள்ள விசேட அதிகாரத்தின் ஊடாக நடைமுறைக்கு வரும் என்பதும் குறிப்பிடத்தக்கது.

உள்நாட்டு மற்றும் வெளிநாட்டு செய்திகளை உடனுக்குடன் அறிந்துகொள்ள WHATSAPP CHANNEL இணையுங்கள்
மேலும் செய்திகளைப் படிக்க இங்கே அழுத்தவும்

விளம்பரம்

தொடர்புடைய செய்திகள் NEW

இலங்கை செய்திகள்

றம்பொடை ஸ்ரீ ஞான வரதர் ஐயப்ப தேவஸ்தானத்தில் மாலை அணியும் நிகழ்வு இடம்பெற்றது

றம்பொடை ஸ்ரீ ஞான வரதர் ஐயப்ப தேவஸ்தானத்தில் ஐயப்ப சுவாமிகள் மாலை அணியும் நிகழ்வு இடம்பெற்றது காலை விநாயகர் வழிபாட்டுடன் ஆரம்பிக்கப்பட்டு பல்வேறு ஹோம திரவியங்கள் இடப்பட்டு…

85 0 0
இலங்கை செய்திகள்

நாட்டின் பல பகுதிகளில் காற்றின் தரம் பாதிப்பு

அக்வான் புயலின் தாக்கம் காரணமாக இன்று நாட்டின் பல பகுதிகளில் காற்றின் தரம் குறைந்துள்ளதாக மத்திய சுற்றாடல் அதிகாரசபை தெரிவித்துள்ளது. இதன்படி, வடக்கு, வடமத்திய, மேல் மற்றும்…

79 0 0
இலங்கை செய்திகள்

பலாங்கொடை கஸ்ஸப தேரர் பிணையில் செல்ல அனுமதி

விளக்கமறியலில் வைக்கப்பட்டுள்ள பலாங்கொடை கஸ்ஸப தேரர், திருகோணமலை நீதவான் நீதிமன்றத்தினால் பிணையில் செல்ல அனுமதிக்கப்பட்டுள்ளார். திருகோணமலை ஸ்ரீ சம்புத்த ஜயந்தி போதிராஜ விஹாரை வளாகத்தில் கூடாரம் அமைத்து…

71 0 0
இலங்கை செய்திகள்

டிசம்பர் மாதம் 45,000 மெட்ரிக் தொன் சமையல் எரிவாயுவை இறக்குமதி செய்யத் தீர்மானம்!

நாட்டின் உள்நாட்டுத் தேவையைப் பூர்த்தி செய்யும் வகையில், டிசம்பர் மாதத்திற்காக 45,000 மெட்ரிக் தொன் திரவப் பெற்றோலிய வாயுவை (LPG) இறக்குமதி செய்ய லிட்ரோ நிறுவனம் தீர்மானித்துள்ளதாக…

79 0 0