நாட்டின் தேசிய நெடுஞ்சாலைகளை அபிவிருத்தி செய்வதற்கும், டிட்வா சூறாவளியினால் சேதமடைந்த வீதிகளைப் புனரமைப்பதற்கும் மொத்தம் 9.1 பில்லியன் ரூபாய் பெறுமதியான நான்கு ஒப்பந்தங்களுக்கு அமைச்சரவை அனுமதி வழங்கியுள்ளது.
இதில், தேசிய நெடுஞ்சாலைகளை விரிவுபடுத்தி மேம்படுத்தும் திட்டத்தின் கீழ் 8.33 பில்லியன் ரூபாய் பெறுமதியான மூன்று ஒப்பந்தங்களும், நாவலப்பிட்டி பகுதியில் சூறாவளியினால் சேதமடைந்த வீதிகளைப் புனரமைப்பதற்காக 763.98 மில்லியன் ரூபாய் பெறுமதியான ஒப்பந்தமும் வழங்கப்பட்டுள்ளன.
இதன்படி, வீதி அபிவிருத்திப் பணிகளுக்கான ஒப்பந்தங்கள் பின்வருமாறு வழங்கப்பட்டுள்ளன.
- RR Construction நிறுவனம்: கொழும்பு – இரத்தினபுரி – வெல்லவாய – மட்டக்களப்பு வீதியின் 7.55 கிலோமீற்றர் பகுதியை மேம்படுத்த 1,485.79 மில்லியன் ரூபாய்.
- RR Construction நிறுவனம்: பெல்மதுளை – எம்பிலிப்பிட்டிய – நோனகம வீதியின் 15 கிலோமீற்றர் பகுதியை மேம்படுத்த 3,739.84 மில்லியன் ரூபாய்.
- Maga Engineering நிறுவனம்: பேராதனை – பதுளை – செங்கலடி வீதியின் 7.04 கிலோமீற்றர் பகுதியை அபிவிருத்தி செய்ய 3,106.21 மில்லியன் ரூபாய்.
- ELS Construction நிறுவனம்: நாவலப்பிட்டி பகுதியில் டிட்வா சூறாவளியினால் சேதமடைந்த வீதிகளைப் புனரமைக்க 763.98 மில்லியன் ரூபாய்.
தேசிய போட்டி கொள்வனவு நடைமுறையின் கீழ், குறைந்த விலையில் தகுதியான கேள்விகளைச் சமர்ப்பித்த நிறுவனங்களுக்கு இந்த ஒப்பந்தங்கள் வழங்கப்பட்டுள்ளதாக அமைச்சர் நளிந்த ஜயதிஸ்ஸ தெரிவித்துள்ளார்.
போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க சமர்ப்பித்த யோசனைக்கு அமைவாக இந்த அனுமதி வழங்கப்பட்டுள்ளது.
