2026ஆம் ஆண்டில் இதுவரையான காலப்பகுதியில் இலங்கை முழுவதும் பதிவான உயிரிழப்புகளை ஏற்படுத்திய 2 ஆயிரத்து 257 வீதி விபத்துக்களில் மொத்தம் 2 ஆயிரத்து 381 பேர் பரிதாபமாக உயிரிழந்துள்ளனர் என்று பொலிஸ் ஊடகப் பேச்சாளர் பிரதிப் பொலிஸ்மா அதிபர் எவ்.யூ.வூட்லர் தெரிவித்தார்.
ஊடகங்களிடம் கருத்துத் தெரிவிக்கையிலேயே அவர் இந்தப் பாரதூரமான புள்ளிவிவரங்களை வெளிப்படுத்தினார்.
நாட்டில் நாளுக்கு நாள் அதிகரித்து வரும் வீதி விபத்து மரணங்கள் குறித்துத் தனது ஆழ்ந்த கவலையை வெளியிட்ட அவர், அதிக வேகம் மற்றும் பொறுப்பற்ற சாரத்தியமே இத்தகைய கோர விபத்துக்களுக்குப் பிரதான காரணங்களாக அமைகின்றன என்றும் சுட்டிக்காட்டினார்.
இந்த ஆண்டில் இடம்பெற்ற வீதி விபத்துக்களில் உயிரிழந்தவர்களில் 785 உந்துருளி செலுத்துநர்களும், 227 பாதசாரிகளும் அடங்குகின்றனர் என்று பொலிஸ் ஊடகப் பேச்சாளர் கூறினார்.
இலங்கையில் தற்போது ஏறக்குறைய அறுபது இலட்சம் பதிவு செய்யப்பட்ட உந்துருளிகள் பயன்பாட்டில் உள்ளன என்று குறிப்பிட்ட அவர், அபாயகரமான முறையில் வாகனங்களைச் செலுத்தும் இளம் சாரதிகள் எதிர்கொள்ளும் பேராபத்துக்கள் குறித்தும் எச்சரித்தார்.
அதிவேகமும் கவனயீனமான வீதிப் பாவனையும் பாரிய பேரழிவுகரமான விளைவுகளை ஏற்படுத்தக்கூடும் என்று சுட்டிக்காட்டிய அவர், தங்கள் பிள்ளைகளுக்கு உந்துருளிகளை வாங்கிக் கொடுக்கும் போது பெற்றோர்கள் அதிகளவு பொறுப்புணர்வுடனும் அவதானத்துடனும் நடந்துகொள்ள வேண்டும் என்றும் வலியுறுத்தினார்.
