மன்னார் புனித சவேரியார் ஆண்கள் பாடசாலை மாணவர்களின் சாதனை பெருவிழா.!
மன்னார் புனித சவேரியார் ஆண்கள் தேசிய பாடசாலை மாணவர்கள் பல்வேறு துறைகளில் ஈட்டிய குறிப்பிடத்தக்க சாதனைகளை கொண்டாடும் திருவிழா நேற்று செவ்வாய்க்கிழமை(3) இடம்பெற்றது.
பாடசாலை அதிபரின் தலைமையில் நடைபெற்ற இந்நிகழ்வில், மன்னார் மாவட்ட அரசாங்க அதிபர் திரு. க. கனகேஸ்வரன், மன்னார் நகர முதல்வர் டானியல் வசந்தன் ஆகியோர் விருந்தினர்களாக கலந்து கொண்டு சர்வதேச மற்றும் தேசிய மட்டங்களில் வெற்றி பெற்ற மாணவர்களை கௌரவித்தனர்.
சர்வதேச கணித போட்டிகள், தேசிய மட்ட தடகளப் போட்டிகள், அகில இலங்கை பாடசாலை கால்பந்தாட்ட போட்டிகள் மற்றும் சர்வதேச கராத்தே போட்டிகள் எனப் பல்வேறு தளங்களில் பதக்கங்களையும் அங்கீகாரங்களையும் வென்று, மன்னார் மண்ணுக்கும் பாடசாலைக்கும் பெருமை சேர்த்த இளம் சாதனையாளர்களை அரசாங்க அதிபர் பாராட்டி, நினைவுச் சின்னங்களையும் பரிசில்களையும் வழங்கி வைத்தார்கள்.
இந்த நிகழ்வில் பாடசாலையின் ஆசிரியர்கள், பெற்றோர்கள் மற்றும் கல்விச் சமூகம் பெருமளவில் கலந்துகொண்டு மாணவர்களை ஊக்கப்படுத்தியமை குறிப்பிடத்தக்கது.






