நோர்வூட் பிரதேச சபைக்கு உட்பட்ட பொகவந்தலாவ பகுதியில் இன்று (02) திடீரென சுமார் ஒரு மணிநேரம் மினி சூறாவளி போன்ற கடும் மழை பெய்துள்ளது.
எவ்வித முன்னெச்சரிக்கை அறிகுறிகளும் இன்றி ஏற்பட்ட இந்த திடீர் காலநிலை மாற்றத்தின்போது, தேயிலைத் தோட்டத்தில் பணியாற்றிக் கொண்டிருந்த நிறைமாத கர்ப்பிணித் தொழிலாளி ஒருவர், மழையில் நனைந்தவாறே தன்னையும் வயிற்றில் உள்ள குழந்தையையும் பாதுகாத்துக்கொள்ள வீட்டை நோக்கி அவசரமாக சென்றுள்ளார்.
மத்திய மலைநாட்டின் நுவரெலியா மாவட்டத்தில் தேயிலைத் தோட்டங்களில் ஆற்றங்கரைகள் மற்றும் தாழ்நிலப் பகுதிகளில் பணியாற்றும் தொழிலாளர்களுக்கு திடீர் காலநிலை மாற்றங்கள் தொடர்பில் முன்கூட்டியே எச்சரிக்கை வழங்கும் செயலிகள் அல்லது விசேட அறிவிப்பு முறைகளை அரசாங்கம் அறிமுகப்படுத்த வேண்டும் என கோரிக்கை விடுக்கப்பட்டுள்ளது.
காலநிலை மாற்றங்களால் விவசாயிகள் பாதிக்கப்படுவது போன்று, நாட்டுக்கு நீண்டகாலமாக அந்நிய செலாவணியை ஈட்டித்தரும் பெருந்தோட்டத் தேயிலைத் தொழிலாளர்களும் திடீர் காலநிலை மாற்றங்களால் விபத்துகள் மற்றும் ஆபத்துகளுக்கு முகங்கொடுத்து வருவதாக மக்கள் சுட்டிக்காட்டுகின்றனர்.
எனவே, பெருந்தோட்டப் பகுதிகளில் காலநிலையை முன்கூட்டியே அறிந்துகொள்ளும் வகையில் உரிய நடவடிக்கைகளை மேற்கொண்டு, ஆபத்தான சூழ்நிலைகளில் தொழிலாளர்களை பாதுகாக்க சம்பந்தப்பட்ட தோட்ட உட்கட்டமைப்பு அமைச்சு உடனடியாக நடவடிக்கை எடுக்க வேண்டும் என பெருந்தோட்ட மக்கள் கோரிக்கை விடுத்துள்ளனர்.
