துபாயிலிருந்து இஸ்ரேலின் டெல் அவிவ் நோக்கி பயணித்த ஃப்ளைடுபாய் பயணிகள் வானூர்தி ஒன்று, அவசரநிலை காரணமாக சவுதி அரேபியாவில் தரையிறக்கப்பட்டுள்ளது.
இன்று அதிகாலை துபாயிலிருந்து புறப்பட்ட சிறிது நேரத்திலேயே குறித்த வானூர்தி அவசரநிலை எச்சரிக்கை சமிக்ஞையை வெளியிட்டதாக வானூர்திக் கண்காணிப்பு தரவுகள் தெரிவிக்கின்றன.
வானூர்தியில் இடம்பெற்ற இந்த சம்பவம் காரணமாக சவுதி அரேபியாவின் தபூக் வானூர்தி நிலையத்தில் பாதுகாப்பாக தரையிறங்கியதாக ஃப்ளைடுபாய் நிறுவனம் தெரிவித்துள்ளது.
வானூர்தியில் இருந்த அனைத்து பயணிகளும் பாதுகாப்பாக இருப்பதாகவும் நிறுவனம் கூறியுள்ளது.
வானூர்தியில் இருந்த இரண்டு விமானிகளுக்கு இடையில் ஏற்பட்ட மோதலே இந்த சம்பவத்துக்கு காரணமாக இருக்கலாம் என இஸ்ரேலிய ஊடகங்கள், அந்நாட்டு அதிகாரிகளை மேற்கோள்காட்டி செய்தி வெளியிட்டுள்ளன.
இதனிடையே, வானூர்தி கண்காணிப்பு தரவுகளின்படி, வானூர்தி 34 ஆயிரம் அடி உயரத்தில் இருந்து இரண்டு நிமிடங்களுக்குள் 17 ஆயிரம் அடிக்கும் குறைவான உயரத்துக்கு திடீரென இறங்கியுள்ளது.
வானூர்தியின்; முன்பகுதியில் இருந்து கூச்சல் சத்தங்கள் கேட்டதாகவும், விமானிகளுக்கு இடையில் ஏற்பட்ட மோதல் குறித்து தாங்கள் கேட்டதாகவும் பயணிகள் கூறியதாக சர்வதேச தகவல்கள் தெரிவிக்கின்றன.
சவூதி அரேபியாவில் வானூர்தி தரையிறங்குவதற்கு முன்னர் அது கடுமையாக உயரம் குறைந்ததாகவும் பயணிகள் கூறியுள்ளனர்.
இந்நிலையில், சவுதி அரேபியாவில் உள்ள இஸ்ரேலிய பயணிகளை பாதுகாப்பாக மீண்டும் இஸ்ரேலுக்கு அழைத்துச் செல்வதற்கான நடவடிக்கைகள் முன்னெடுக்கப்பட்டுள்ளதாக இஸ்ரேல் பிரதமர் பெஞ்சமின் நெதன்யாகுவின் அலுவலகம் தெரிவித்துள்ளது.
இந்த சம்பவம் கட்டுப்பாட்டுக்குள் கொண்டுவரப்பட்டுள்ளதாகவும், இஸ்ரேலிய பயணிகளை பாதுகாப்பாக நாட்டுக்கு அழைத்துவர தேவையான அனைத்து நடவடிக்கைகளும் முன்னெடுக்கப்பட்டு வருவதாகவும் அந்த அலுவலகம் கூறியுள்ளது.
குறித்த வானூர்தியில் சுமார் 180 இஸ்ரேல் நாட்டுப் பயணிகள் பயணித்துள்ளமை குறிப்பிடத்தக்கது.
