“வளமான நாடு – அழகான வாழ்வு” மற்றும் “புத்துயிர்க்கும் புதுநகரம்” என்ற தொனிப்பொருளில் 2026ஆம் ஆண்டுக்கான உள்ளூராட்சி வார நிகழ்வுகள் இன்று (14) திருக்கோவில் பிரதேச சபையில் ஆரம்பமாகின.
பொது நிர்வாக, மாகாண சபைகள் மற்றும் உள்ளூராட்சி அமைச்சின் ஏற்பாடு மற்றும் வழிகாட்டலின் கீழ் நடைபெறும் இந்நிகழ்வுகள், பாதுகாப்பானதும் வாழ்வதற்கு ஏற்றதுமான சூழலை உருவாக்கி, பொதுமக்களின் அன்றாடத் தேவைகளை நிறைவேற்றுவதுடன், தொலைநோக்கான எதிர்காலத்தை உறுதிப்படுத்தும் வகையில் “புத்துயிர்க்கும் புதுநகரங்களை” உருவாக்கும் தொடர் வேலைத்திட்டங்களின் ஒரு பகுதியாக முன்னெடுக்கப்படுகின்றன.
திருக்கோவில் பிரதேச சபையின் கௌரவ தவிசாளர் சுந்தரலிங்கம் சசிகுமார் அவர்களின் பணிப்புரைக்கு அமைவாக செப்டெம்பர் 14 முதல் 19ஆம் திகதி வரை பல்வேறு நிகழ்வுகள் திட்டமிடப்பட்டுள்ளன.
இதன்படி, செப்டெம்பர் 14ஆம் திகதி நடமாடும் சேவை மற்றும் வருமானமீட்டும் தினம், 15ஆம் திகதி பொதுப்பயன்பாட்டு தினம் மற்றும் சர்வதேச ஜனநாயக தினம், 16ஆம் திகதி சுற்றாடல் மற்றும் மரநடுகை தினம், சர்வதேச ஓசோன் படலப் பாதுகாப்பு தினம், 17ஆம் திகதி சுகாதாரம் மற்றும் துப்புரவு தினம், சர்வதேச நோயாளர் பாதுகாப்பு தினம், 18ஆம் திகதி இலக்கியம், கல்வி, நூலகம் மற்றும் விளையாட்டு தினம் ஆகியன நடைபெறவுள்ளன.
செப்டெம்பர் 19ஆம் திகதி சான்றிதழ் வழங்கும் நிகழ்வும் விழா நிறைவும் இடம்பெற்று உள்ளூராட்சி வார நிகழ்வுகள் நிறைவடையவுள்ளன.
இன்றைய ஆரம்ப நிகழ்வில் தேசியக்கொடி ஏற்றப்பட்டு தேசிய கீதம் இசைக்கப்பட்டு மரியாதை செலுத்தப்பட்டதுடன், உள்ளூராட்சி வார கீதமும் இசைக்கப்பட்டது.
இதனைத் தொடர்ந்து திருக்கோவில் பிரதேச சபையின் செயலாளர், பிரதம முகாமைத்துவ சேவை உத்தியோகத்தர், தொழில்நுட்ப உத்தியோகத்தர், நிதி உதவியாளர் உள்ளிட்ட உத்தியோகத்தர்கள் மங்கள விளக்கேற்றி நிகழ்வுகளை ஆரம்பித்து வைத்தனர்.
இதன் பின்னர், வருமான அறவீட்டின் முதற்கட்ட நடவடிக்கையாக பிரதேச சபை உத்தியோகத்தர்கள் குழுக்களாகப் பிரிந்து திருக்கோவில் பிரதேசத்தின் பல்வேறு பகுதிகளுக்குச் சென்று, பிரதேச சபையின் வருமானத்தை அதிகரிப்பது தொடர்பான விழிப்புணர்வு நடவடிக்கைகளை முன்னெடுத்தனர்.
பொதுமக்களின் பங்களிப்புடன் உள்ளூராட்சி சேவைகளை மேலும் வலுப்படுத்தும் நோக்கில் இந்த உள்ளூராட்சி வார நிகழ்வுகள் முன்னெடுக்கப்படுகின்றமை குறிப்பிடத்தக்கது.
