காஸா மீது இஸ்ரேல் நடத்திய தாக்குதலில் 3 பாலஸ்தீனர்கள் பலி!

காஸாவின் பல பகுதிகளில் இஸ்ரேலியப் படைகள் நடத்திய தாக்குதல்களில் 3 பாலஸ்தீனர்கள் உயிரிழந்துள்ளதுடன், 15க்கும் மேற்பட்டோர் காயமடைந்துள்ளதாக மருத்துவமனை வட்டாரங்களை மேற்கோள்காட்டி வெளிநாட்டு ஊடகங்கள் செய்தி வெளியிட்டுள்ளன.

இஸ்ரேலியப் படைகள் காசாவின் பல பகுதிகளில் நடத்திய ஆளில்லா வானூர்தி (Drone) தாக்குதல்களில் இருவர் உயிரிழந்ததுடன் பலர் காயமடைந்துள்ளனர்.

இதன்படி, டேர் அல்-பலா (Deir al-Balah) பகுதிக்குத் தெற்கே உள்ள வாடி அல்-சல்கா (Wadi al-Salqa) பகுதியில் நடத்தப்பட்ட தாக்குதலில் ஒருவர் உயிரிழந்ததுடன் பலர் காயமடைந்ததுடன், வடக்கு காசாவின் ஜபலியா அல்-பலாத் பகுதியில் நடத்தப்பட்ட மற்றொரு தாக்குதலில் மேலும் ஒருவர் உயிரிழந்துள்ளார்.

இதனிடையே, அல்-கராரா (al-Qarara) பகுதியில் முன்னதாக நடத்தப்பட்ட ஆளில்லா வானூர்தி தாக்குதலில் படுகாயமடைந்த கான் யூனிஸ் பகுதியைச் சேர்ந்த மொஹமட் கலீல் மொஹமட் சலீம் (38) எனும் நபர் சிகிச்சை பலனின்றி உயிரிழந்துள்ளார்.