அரண்மனையின் முழுமையான புதுப்பிப்பு பணிகளுக்காக சுமார் 370 மில்லியன் பவுண்டுகள் செலவிடப்படவுள்ளதாக அரச குடும்பத்தின் புதிய நிதி அறிக்கையில் தெரிவிக்கப்பட்டுள்ளது.
இந்த மிகப்பெரிய திட்டம் பல ஆண்டுகளாக நடைபெற்று வரும் நிலையில் அரண்மனையின் மின்சாரம், நீர்வழங்கல், வெப்பமூட்டும் அமைப்புகள் உள்ளிட்ட முக்கிய உள்கட்டமைப்புகள் முழுமையாக நவீனமயமாக்கப்பட்டு வருகின்றன.
எனினும், இந்தப் பணிகள் நிறைவடைந்த பிறகும் மன்னர் மூன்றாம் சார்ல்ஸ் பக்கிங்காம் அரண்மனையில் நிரந்தரமாக குடியேற மாட்டார் என தகவல் வெளியாகியுள்ளது.
அதற்கு பதிலாக, அவர் தற்போது வசித்து வரும் கிளாரன்ஸ் ஹவுஸிலேயே தொடர்ந்து தங்கியிருப்பார் என்று தெரிவிக்கப்பட்டுள்ளது.
இருப்பினும் அரச நிகழ்வுகள், வெளிநாட்டு தலைவர்களை வரவேற்பது மற்றும் முக்கிய அரச மரியாதை நிகழ்ச்சிகளுக்காக பக்கிங்காம் அரண்மனை தொடர்ந்து பயன்படுத்தப்படும்.
அரச குடும்பத்தின் ஆண்டு நிதி அறிக்கையில், மன்னர் சார்ல்ஸ் செலுத்திய தனிப்பட்ட வருமான வரி, அரச குடும்ப உறுப்பினர்களின் உள்நாட்டு மற்றும் வெளிநாட்டு பயணச் செலவுகள் உள்ளிட்ட பல்வேறு நிதி விவரங்களும் வெளியிடப்பட்டுள்ளன.
அரச செலவினங்களில் வெளிப்படைத்தன்மையை உறுதிப்படுத்தும் நோக்கில் இந்த அறிக்கை ஆண்டுதோறும் வெளியிடப்படுகிறது.
இதற்கிடையில், அரண்மனை புதுப்பிப்பு செலவு அதிகரித்திருப்பது குறித்து பிரித்தானியாவில் அரச செலவுகள் தொடர்பாக மீண்டும் விவாதங்கள் எழுந்துள்ளன.
ஒருபுறம், நாட்டின் பாரம்பரிய சின்னத்தை பாதுகாக்க இந்த முதலீடு அவசியம் என சிலர் வலியுறுத்தும் நிலையில், மறுபுறம் பொருளாதார சவால்கள் நிலவும் காலத்தில் இவ்வளவு பெரிய தொகை செலவிடப்படுவது குறித்து விமர்சனங்களும் முன்வைக்கப்பட்டுள்ளன.
