சூரியனிலிருந்து மிக சக்திவாய்ந்த சூரியப் பேரலை (Solar Flare) ஒன்று பதிவாகியுள்ளதாக அமெரிக்காவின் தேசிய பெருங்கடல் மற்றும் வளிமண்டல நிர்வாகத்தின் (NOAA) விண்வெளி வானிலை கண்காணிப்பு மையம் தெரிவித்துள்ளது.
இந்த வெடிப்பு ‘X1.0 Class’ வகையைச் சேர்ந்ததாக அடையாளம் காணப்பட்டுள்ளதுடன், இது அண்மைக் காலங்களில் பதிவான குறிப்பிடத்தக்க சூரிய வெடிப்புகளில் ஒன்றாகக் கருதப்படுகிறது.
சூரியப் பேரலைகள் காரணமாக பூமியின் மேல் வளிமண்டலத்தில் மின்னணு அலைகள் பாதிக்கப்படக்கூடும் என்பதால், வானொலி தொடர்புகள், விமானப் போக்குவரத்து தொடர்பாடல் அமைப்புகள் மற்றும் GPS வழிகாட்டி சேவைகளில் தற்காலிக இடையூறுகள் ஏற்படும் சாத்தியம் உள்ளதாக நிபுணர்கள் எச்சரித்துள்ளனர்.
இதேவேளை, விண்வெளி வானிலை தொடர்பான நிலைமைகள் தொடர்ச்சியாக கண்காணிக்கப்பட்டு வருவதாகவும், தேவையான முன்னெச்சரிக்கை நடவடிக்கைகள் எடுக்கப்பட்டுள்ளதாகவும் அதிகாரிகள் தெரிவித்துள்ளனர்.
சூரிய செயற்பாடுகள் அதிகரித்து வரும் நிலையில், எதிர்வரும் நாட்களில் மேலும் சூரிய வெடிப்புகள் பதிவாகும் வாய்ப்பு இருப்பதாகவும் விண்வெளி ஆய்வாளர்கள் சுட்டிக்காட்டியுள்ளனர்.
