சம்பியன்ஸ் லீக் கால்பந்து இறுதிப்போட்டியில் பாரிஸ் செயின்ட் ஜெர்மைன் (PSG) அணி வெற்றி பெற்றதைத் தொடர்ந்து, பிரான்ஸ் முழுவதும் கால்பந்து ரசிகர்களுக்கும் பொலிஸாருக்கும் இடையே ஏற்பட்ட பயங்கர மோதல்களில் 219 பேர் காயமடைந்துள்ளனர்.
காயமடைந்தவர்களில் 8 பேரின் நிலைமை கவலைக்கிடமாக உள்ளதாக பிரான்ஸ் உள்துறை அமைச்சர் லோரண்ட் நுனேஸ் (Laurent Nuñez) தெரிவித்துள்ளார்.
அத்துடன், கலவரத்தைக் கட்டுப்படுத்தும் பணியில் ஈடுபட்டிருந்த 57 பொலிஸ் அதிகாரிகளும் இந்த மோதல்களில் காயமடைந்துள்ளனர்.
தலைநகர் பாரிஸில் பேருந்து மற்றும் தொடருந்து சேவைகளைப் பாதித்த இந்த வன்முறைகள் தொடர்பாக இதுவரை 780 பேர் கைது செய்யப்பட்டுள்ளதுடன், 450க்கும் அதிகமானோர் காவலில் வைக்கப்பட்டுள்ளனர்.
இதேவேளை, கலவரக்காரர்கள் மறிக்க முயன்ற பாரிஸின் சுற்றுவட்ட வீதியில் ஏற்பட்ட விபத்தொன்றில் 24 வயதுடைய நபர் ஒருவர் உயிரிழந்துள்ளார்.
வன்முறைகளுக்கு மத்தியில், பி.எஸ்.ஜி (PSG) அணியின் வெற்றிக் கொண்டாட்ட ஊர்வலம் ஈபிள் கோபுரப் பகுதியில் பல்லாயிரக்கணக்கான ரசிகர்களின் பங்கேற்புடன் அமைதியான முறையில் ஆரம்பமாகியுள்ளது.
இந்த ஊர்வலத்தின் பாதுகாப்பிற்காக மாத்திரம் சுமார் 6,000 பொலிஸார் குவிக்கப்பட்டுள்ளனர்.
பொது ஒழுங்கைப் பேணுவதில் பிரான்ஸ் ஒரு சிறந்த நாடு எனக் குறிப்பிட்டுள்ள உள்துறை அமைச்சர், அமைதியான முறையில் ஒன்று கூடுவதை அனுமதிப்பதாகவும், ஆனால் வன்முறைகளில் ஈடுபடுபவர்கள் மீதான நடவடிக்கைகள் மிகவும் கடுமையானதாக இருக்கும் என்றும் எச்சரித்துள்ளார்.
