ஷார்ஜாவிலிருந்து புறப்பட்ட ஏர் அரேபியா விமானம் ஒன்று இன்று அதிகாலை மே 03 ஆம் திகதி சென்னை சர்வதேச விமான நிலையத்தில் தரையிறங்கியபோது, ஓடுபாதையில் இருந்த விமானத்தின் அவசரகாலக்கதவைத் திறந்து பயணியொருவர் வெளியே குதித்துள்ளார்.
விமானம் மிகவும் மெதுவாக நகர்ந்து கொண்டிருந்ததாலும், பிரதான ஓடுபாதையிலிருந்து விலகிச்சென்றதாலும் அந்த நபர் வெளியே குதித்ததாக விமான நிலைய அதிகாரிகள் தெரிவித்துள்ளனர்.
இருப்பினும், இந்த சம்பவத்தில் யாருக்கும் காயம் ஏற்படவில்லை என்றும், விமானப் பயணத்தின்போது சம்பந்தப்பட்ட பயணிக்குக் கடுமையான உடல்நலக்குறைவு ஏற்பட்டதாகவும் முதற்கட்ட விசாரணையில் தெரியவந்துள்ளது.
விமானப் பயணத்தின் போது அவர் இரண்டு முறை வாந்தி எடுத்ததாகவும், இந்தச் சம்பவத்தால் விமான நிலையப்பணிகளிலும் சிறிய இடையூறு ஏற்பட்டுள்ளதாக விமான நிலைய அதிகாரிகள் தெரிவித்துள்ளனர். குறித்த பயணி தமிழ்நாட்டின் புதுக்கோட்டை மாவட்டத்தைச் சேர்ந்தவர் என தெரிவிக்கப்பட்டுள்ளது.
இவர் விதிகளை மீறியது குறித்து அதிகாரிகள் தற்போது விரிவான விசாரணையைத் தொடங்கியுள்ளனர்.
