அமெரிக்க ராப் பாடகர் நாட்டுக்குள் நுழைய தடை விதிக்க வேண்டும் என யோர்க் சென்ட்ரல் எம்.பி. வலியுறுத்தல்!
அமெரிக்க ராப் பாடகரான கான்யே வெஸ்ட் (Kanye West) இங்கிலாந்தில் நிகழ்ச்சிகள் நடத்துவதற்குத் தடை விதிக்கப்பட வேண்டும் என யோர்க் சென்ட்ரல் நாடாளுமன்ற உறுப்பினர் ரேச்சல் மாஸ்கெல் (Rachael Maskell) வலியுறுத்தியுள்ளார்.
அண்மைய ஆண்டுகளில் கான்யே வெஸ்ட் யூத-விரோத கருத்துக்களைத் தெரிவித்ததை அடுத்து லண்டனில் நடைபெறும் வயர்லெஸ் திருவிழாவின் பங்கேற்பாளர்கள் பட்டியலிலிருந்து அவரை நீக்க வேண்டும் என்ற கோரிக்கையை ரேச்சல் மாஸ்கெல் எழுப்பியுள்ளார்.
இந்த ஜூலை மாதம் ஃபின்ஸ்பரி பூங்காவில் நடைபெறும் திருவிழாவின் மூன்று இரவுகளிலும் முக்கியக் கலைஞராகப் பங்கேற்க உள்ள இந்த ராப் பாடகர், தொடர்ச்சியான யூத-விரோதக் கருத்துக்களுக்காகவும், அடால்ஃப் ஹிட்லர் மீதான பகிரங்கமான அபிமானத்திற்காகவும் பரவலாக விமர்சிக்கப்பட்டு வருகிறார்.
வயர்லெஸ் திருவிழாவில் கான்யே வெஸ்ட் முதன்மைக் கலைஞராக அறிவிக்கப்பட்ட பின்னர் பெப்சி (Pepsi) மற்றும் டயாஜியோ (Diageo) நிறுவனங்கள் நிகழ்விற்க்கான தங்களது நிதியுதவியை விலக்கிக் கொண்டன.
2015 ஆம் ஆண்டு கிளாஸ்டன்பரி திருவிழாவில் முதன்மைக் கலைஞராகப் பங்கேற்ற பின்னர் இவர் இங்கிலாந்தில் எந்த நிகழ்ச்சியும் நடத்தவில்லை என்பதும் குறிப்பிடத்தக்கது.
