மக்களுக்கும் பொருளாதாரத்துக்கும் வலுச்சேர்க்கும் 2026 வரவுசெலவுத் திட்டத்தை ஒன்ராறியோ வெளியிட்டது ஒன்ராறியோ அரசாங்கம் கடந்த 2026 மார்ச் 26 அன்று, தொழிலாளர்களையும் குடும்பங்களையும் பாதுகாக்கும் நோக்கில் தனது 2026ஆம் ஆண்டுக்கான வரவுசெலவுத் திட்டத்தை வெளியிட்டது.
இதன் மூலம் புதிய வீடுகளை வாங்குவோருக்கு 130,000 டொலர்கள் வரை வரி மீளளிப்புச் சலுகை வழங்கப்படுவதுடன், வீட்டு வசதித் துறையில் சுமார் 2.2 பில்லியன் டொலர்கள் வரி நிவாரணமாக ஒதுக்கப்பட்டுள்ளன.
அத்துடன், சிறு வணிகங்களுக்கான வரி வீதம் 3.2 சதவீதத்திலிருந்து 2.2 சதவீதமாகக் குறைக்கப்படவுள்ளதால், சுமார் 375,000 வணிகங்கள் அடுத்த மூன்று ஆண்டுகளில் 1.1 பில்லியன் டொலர்களைச் சேமிக்க வழிவகை செய்யப்பட்டுள்ளது.
உழைக்கும் குடும்பங்களுக்கும் சிறு வணிகங்களுக்கும் முன்னுரிமை அளிக்கும் வகையில் இந்தத் திட்டம் அமைந்துள்ளதாக அமைச்சர் விஜய் தணிகாசலம் தெரிவித்தார். குறிப்பாக ஸ்காபரோ பிராந்திய மக்கள் மேம்படுத்தப்பட்ட போக்குவரத்து மற்றும் உட்கட்டமைப்பு வசதிகளைப் பெற்றுக்கொள்ளவுள்ளனர்.
இதில் ஸ்காபரோ நிலக்கீழ்த் தொடரி விரிவாக்கம் மற்றும் நெடுஞ்சாலைகள் சீரமைப்பு என்பன முக்கியமானவை.
மேலும், 3.4 பில்லியன் டொலர் முதலீட்டில் சுமார் 20 இலட்சம் மக்களுக்கு மேலதிகமாக ஆரம்ப சுகாதார சேவைகளை வழங்கவும், குடும்பங்களின் எரிசக்தி மற்றும் போக்குவரத்துச் செலவுகளைக் குறைக்கவும் நடவடிக்கை எடுக்கப்பட்டுள்ளது.
பொதுமக்களின் பாதுகாப்பை உறுதிப்படுத்துவதற்காக 2026இல் ‘ரொறன்ரோ இடைக்கால நிலையம்’ மீண்டும் திறக்கப்பட்டு, மேலதிக படுக்கை வசதிகளுடன் 700 இற்கும் மேற்பட்ட புதிய பணியாளர்கள் நியமிக்கப்படவுள்ளனர்.
ஒட்டுமொத்தமாக வரிச்சலுகைகள், உட்கட்டமைப்புகளுக்கான மேம்பாடு மற்றும் பாதுகாப்பு முயற்சிகள் ஊடாக ஒரு வலிமையான, பிணைக்கப்பட்ட மற்றும் தன்னிறைவு கொண்ட ஒன்ராறியோவை உருவாக்குவதே இந்த 2026 வரவுசெலவுத் திட்டத்தின் பிரதான நோக்கமாகும்.
