வல்வெட்டித்துறை தீருவில் சதுக்கத்தில் மாவீரர் வார நிகழ்வுகள் ஆரம்பம்.!
வல்வெட்டித்துறை தீருவில் சதுக்கத்தில் தமிழ்த் தேசிய மாவீரர் நாள் நிகழ்வு இன்று சனிக்கிழமை ஆரம்பிக்கப்பட்டுள்ளது. மாவீரர்களுக்கு அஞ்சலி செலுத்த எதிர்வரும் நவம்பர் 27ஆம் திகதி அணிதிரளுமாறு வடமராட்சி மக்களுக்கு ஏற்பாட்டுக் குழுவினர் அழைப்பு விடுத்துள்ளனர்.
தீருவில் சதுக்கத்தில் உடைக்கப்பட்ட நிலையில் உள்ள குமரப்பா, புலேந்திரன் உள்ளிட்ட பன்னிரு வேங்கைகளின் நினைவுத் தூபிச் சிதைவுகளுக்கு மத்தியில் சுடரேற்றி அஞ்சலி செலுத்தப்பட்டது. தமிழ் மாவீரர் நாள் நிகழ்வு வல்வெட்டித்துறை தீருவில் சதுக்கத்தில் வருடா வருடம் மிகவும் எழுச்சிபூர்வமாக முன்னெடுக்கப்பட்டு வருகின்றது.
மாவீரர் வாரம் இன்று சனிக்கிழமை ஆரம்பமாகியுள்ள நிலையில், தீருவில் சதுக்கத்தில் சிரமதானப் பணிகள் ஆரம்பிக்கப்பட்டுள்ளன. தீருவில் சதுக்க மாவீரர் நாள் ஏற்பாட்டுக் குழுவினரால் மாவீரர்களுக்குச் சுடரேற்றி அஞ்சலி செலுத்தப்பட்டுச் சிரமதானப் பணிகள் முன்னெடுக்கப்பட்டன. இதன்போது, தீருவில் சதுக்கப் பகுதி துப்பரவு செய்யப்பட்டு, சிவப்பு மற்றும் மஞ்சள் நிறக் கொடிகள் கட்டப்பட்டு மாவீரர் நாள் நிகழ்வுக்கான ஏற்பாடுகள் நடைபெற்று வருகின்றன.
வரும் நவம்பர் 27ஆம் திகதி மாலை வழமை போன்று தீருவில் சதுக்கத்தில் மாவீரர் நாள் நிகழ்வு மிகவும் எழுச்சியுடன் முன்னெடுக்கப்படவுள்ளது. அந்த நேரத்தில் வல்வெட்டித்துறை மற்றும் வடமராட்சி வாழ் உறவுகள் அனைவரும், தமிழர் தேச விடுதலைக்காக தமது இன்னுயிர்களை ஈந்த மாவீரர்களுக்கு அஞ்சலி செலுத்த வருமாறு நினைவேந்தல் குழு கேட்டுக்கொண்டுள்ளது.






