சர்வதேச கிரிக்கெட்டிலிருந்து கிளென் மேக்ஸ்வெல் விலகல்!
அவுஸ்திரேலிய கிரிக்கெட் அணியின் நட்சத்திர சகலதுறை ஆட்டக்காரரான 38 வயதான கிளென் மேக்ஸ்வெல், சர்வதேச கிரிக்கெட்டின் அனைத்து வடிவங்களிலிருந்தும் விலகுவதாக முறைப்படி அறிவித்துள்ளார்.
2025 ஜூன் மாதம் ஒருநாள் (ODI) போட்டிகளிலிருந்து ஓய்வு பெற்றிருந்த அவர், தற்போது இருபதுக்கு 20 (T20I) வடிவத்திற்கும் முற்றுப்புள்ளி வைத்து தனது 14 ஆண்டு கால சர்வதேச பயணத்தை நிறைவு செய்துள்ளார்.
தன் சர்வதேச கிரிக்கெட் வாழ்க்கையில் அவுஸ்திரேலிய அணிக்காக 286 போட்டிகளில் விளையாடியுள்ள மேக்ஸ்வெல், மொத்தமாக 7,226 ஓட்டங்களை விளாசியதுடன் 136 விக்கெட்டுகளையும் வீழ்த்தியுள்ளார்.
இதில் 149 ஒருநாள் போட்டிகளில் 3,990 ஓட்டங்களும் (அதிகபட்சம்: 201*) 77 விக்கெட்டுகளும், அவுஸ்திரேலியா சார்பில் அதிகபட்சமாக 130 இருபதுக்கு 20 போட்டிகளில் 2,897 ஓட்டங்களும் (ரோஹித் சர்மாவுக்கு நிகராக 5 சதங்கள்) 51 விக்கெட்டுகளும், 7 டெஸ்ட் போட்டிகளில் 339 ஓட்டங்களும் அடங்கும்.
அவுஸ்திரேலிய அணி வென்ற 2015 மற்றும் 2023 ஒருநாள் உலகக் கிண்ண தொடர்களிலும், 2021 இருபதுக்கு 20 உலகக் கிண்ணத் தொடரிலும் பிரதான தூணாக திகழ்ந்த மேக்ஸ்வெல், 2023 உலகக் கிண்ணத்தில் ஆப்கானிஸ்தானுக்கு எதிராக தசைப்பிடிப்பால் அவதிப்பட்ட நிலையிலும் ஆட்டமிழக்காமல் அடித்த 201* ஓட்டங்கள் கிரிக்கெட் வரலாற்றின் மிகச்சிறந்த இன்னிங்ஸ்களில் ஒன்றாக பேசப்படுகிறது.
அவுஸ்திரேலிய கிரிக்கெட் சபையின் (Cricket Australia) 2026-27 ஆண்டுக்கான ஒப்பந்தப் பட்டியலில் பெயர் சேர்க்கப்படாத நிலையில், இளைய வீரர்களுக்கு வழியமைக்கும் நோக்கில் அவர் இந்த முடிவை எடுத்துள்ளார்.


