டித்வா அனர்த்தத்தால் இடம்பெயர்ந்த மக்களுக்கு ஒதுக்கப்பட்ட நிதி சரியான முறையில் மக்களைச் சென்றடையவில்லை என்று எதிர்க்கட்சித் தலைவர் சஜித் பிரேமதாஸ குற்றம் சாட்டினார்.
நாடாளுமன்றத்தில் இன்று வியாழக்கிழமை உரையாற்றும்போதே அவர் மேற்கண்டவாறு தெரிவித்தார்.
அங்கு அவர் மேலும் குறிப்பிடுகையில்,
“நாடாளுமன்றம் கூடி, டித்வா காரணமாகப் பாதிக்கப்பட்ட மக்களுக்காகவும் உட்கட்டமைப்பு வசதிகளை மேம்படுத்துவதற்காகவும் 500 பில்லியன் ரூபாவுக்கும் அதிகமான தொகையை ஒதுக்கிய போதிலும், இந்த நிதியை மக்களிடம் கொண்டு சேர்ப்பதில் நிதி மற்றும் பௌதீக ரீதியிலான முன்னேற்றம் பலவீனமான மட்டத்தில் காணப்படுகின்றது.
உதவிகளைப் பெற்றுக் கொடுக்கும் முன்னேற்றம் 50 வீதம், 25 வீதம் போன்ற குறைந்த சதவீதத்திலேயே காணப்படுவதோடு, வெளிநாட்டு முதலீடுகள் மூலம் கிடைத்த உதவிகளும் குறைந்த அளவிலேயே கிடைத்துள்ளன. இதற்கு அரசு காரணம் கூற வேண்டும்.” – என்றார்.
உலகளாவிய காலநிலை மாற்றங்களுக்கு எதிர்பாராதவிதமாக முகங்கொடுக்க நேர்ந்துள்ளதால், தற்போது நாட்டில் காணப்படும் பொறிமுறை, வேலைத்திட்டம் மற்றும் சட்டங்கள் அனைத்தும் காலாவதியாகியுள்ளன என்று தெரிவித்த எதிர்க்கட்சித் தலைவர்,
“பேரழிவு ஏற்பட்ட பின் பதிலளிப்பதை விட, அதற்கு முன்னதாகவே தாக்கங்களைக் குறைக்கும் புதிய கட்டமைப்புகள் மற்றும் சட்டங்களை நோக்கிச் செல்வதற்கு அரசு தயாராக வேண்டும்.”- என்றும் வலியுறுத்தினார்.
