இரத்தினபுரி பொலிஸ் பிரிவுக்குட்பட்ட பகுதியில் நேற்று புதன்கிழமை (21) மேற்கொள்ளப்பட்ட சுற்றிவளைப்பின்போது, ஹெரோயின் போதைப்பொருள், தோட்டாக்கள் மற்றும் வாள் உள்ளிட்ட பொருட்களுடன் ஆண் ஒருவரும் பெண் ஒருவரும் இரத்தினபுரி குற்றத்தடுப்புப் பிரிவினரால் கைது செய்யப்பட்டுள்ளனர்.
இரத்தினபுரி குற்றத்தடுப்புப் பிரிவு அதிகாரிகளுக்குக் கிடைத்த இரகசியத் தகவலின் அடிப்படையில் இச்சோதனை நடவடிக்கை முன்னெடுக்கப்பட்டது.
இதன்போது படகெலே பகுதியைச் சேர்ந்த 29 வயதுடைய ஆண் மற்றும் 25 வயதுடைய பெண் ஆகியோர் கைது செய்யப்பட்டுள்ளனர்.
சந்தேகநபரிடமிருந்து 07 கிராம் 845 மில்லிகிராம் ‘ஹெரோயின்’ போதைப்பொருள், ஹெரோயின் கொள்முதல் செய்வதற்காக 124,500/= ரூபா பணத்தை வங்கியில் வைப்பிலிட்டதற்கான ரசீது, 06 நேரடி வெடிமருந்துத் தோட்டாக்கள் (T56 வகை), 02 தோட்டாக்கள், 01 பயிற்சித்துப்பாக்கித் தோட்டா, 03 வெற்றுத் தோட்டா உறைகள் மற்றும் உள்நாட்டில் தயாரிக்கப்பட்ட துப்பாக்கியின் பீப்பாய் ஒன்று மற்றும் ஒரு வாள் என்பன கைப்பற்றப்பட்டுள்ளன.
சந்தேகநபர்கள் இருவரும் இன்று வியாழக்கிழமை (22) இரத்தினபுரி நீதவான் நீதிமன்றத்தில் ஆஜர்படுத்தப்படவுள்ளதுடன், இரத்தினபுரி குற்றத்தடுப்புப் பிரிவு மேலதிக விசாரணைகளில் ஈடுபட்டு வருகிறது.
